BAKI, AzerVoice

Tehranın mərkəzində yerləşən Böyük Bazar ərazisində etiraz aksiyaları ikinci həftəsinə daxil olub. Dünən səhər yayılan görüntülərdə paytaxtın mərkəzində, bazara yaxın ərazilərdə toplaşan etirazçıların dağıdılması üçün gözyaşardıcı qazdan istifadə edildiyi, yan küçələrin bağlandığı və gücləndirilmiş təhlükəsizlik tədbirlərinin tətbiq olunduğu görünür.

Məlumata görə, etirazlar gecə saatlarında da paytaxtın müxtəlif məhəllələrində və bir sıra şəhərlərdə davam edib. Aksiyalar zamanı təkərlərin yandırıldığı, yolların bağlandığı və hakimiyyət əleyhinə şüarların səsləndirildiyi bildirilir. Təhlükəsizlik vəziyyəti ilə əlaqədar Təhsil Nazirliyi bəzi universitetlərə dərsləri onlayn formatda keçirməyə icazə verib. Fəallar bu qərarı təhlükəsizlik amilləri ilə əlaqələndirir. Eyni zamanda, internet şəbəkəsində genişmiqyaslı pozuntular barədə məlumatlar yayılıb.

Hüquq-müdafiə təşkilatları etirazlar zamanı azı 16 nəfərin həlak olduğunu, yüzlərlə şəxsin saxlanıldığını bildirir. Rəsmi qurumlar isə 12 nəfərin öldüyünü açıqlayaraq aksiyaları “məhdud” xarakterli kimi təqdim ediblər.

Bununla paralel, İsrailin baş naziri Benyamin Netanyahu İranda vəziyyətin həlledici mərhələyə qədəm qoyduğunu deyib. Onun sözlərinə görə, “çox güman ki, İran xalqının taleyini öz əlinə aldığı bir anın astanasındayıq”.