BAKI,AzerVoice, Fərid Mikayılov

İran Venesuela Prezidenti Nikolas Maduronun dərhal və qeyd-şərtsiz azadlığa buraxılmasını tələb edib.

AzerVoice xəbər verir ki, bu çağırış İran Xarici İşlər Nazirliyinin sözçüsü İsmayıl Bəqai tərəfindən səsləndirilib.

İran XİN sözçüsü ABŞ-ın Venesuelaya qarşı həyata keçirdiyi hərbi müdaxiləni kəskin şəkildə pisləyərək, bu addımı milli suverenliyin fundamental prinsiplərinin açıq şəkildə pozulması kimi qiymətləndirib. Bəqai bildirib ki, belə bir hücum heç bir halda əsaslandırıla bilməz və beynəlxalq hüquqa ziddir.

Onun sözlərinə görə, beynəlxalq normaların davamlı şəkildə pozulması qlobal ictimaiyyəti ciddi nəticələr barədə düşünməyə vadar etməlidir.

Bəqai beynəlxalq münasibətlərdə “açıq güc tətbiqinin” bütün mövcud norma və qaydalara zidd olduğunu vurğulayaraq, bunun qəti şəkildə qəbuledilməz olduğunu qeyd edib. O, həmçinin “güc yolu ilə sülh” anlayışının təşviq edilməsinin hüquqsuz bir dünya yaratmaq anlamına gəldiyini bildirib.

Bəqai Venesueladakı vəziyyətlə bağlı İran vətəndaşlarının təhlükəsizliyinə də toxunub. Bildirilib ki, İran İslam Respublikasının Venesueladakı səfirliyi və diplomatik heyəti tam təhlükəsizlik şəraitdədir və ölkədə yaşayan İran vətəndaşlarının durumu daimi nəzarətdə saxlanılır. Hazırda heç bir insident barədə məlumat daxil olmayıb.

İran XİN sözçüsü vurğulayıb ki, Venesuelada idarəetmə sistemi dəyişməyib və rəsmi Tehran öz milli maraqlarının qorunması baxımından vəziyyəti yaxından izləməkdə davam edir.