BAKI,AzerVoice, Fərid Mikayılov

Fələstin Dövlətinin Londondakı Səfirliyi rəsmi olaraq fəaliyyətə başlayıb.

AzerVoice xəbər verir ki, səfirliyin açılışı Böyük Britaniyanın Fələstin Dövlətini tanımasından təxminən dörd ay sonra baş tutub.

Əvvəllər Fələstin missiyası kimi fəaliyyət göstərən diplomatik nümayəndəlik Londonun qərbində, Hammersmith bölgəsində yerləşən binada açılıb. Açılış mərasimində bir sıra xarici diplomatlar, Böyük Britaniyanın diplomatik nümayəndəsi Alistair Harrison, eləcə də Fələstinə dəstək göstərən ictimai fəallar iştirak ediblər.

Mərasimdə çıxış edən Husam Zomlot, səfirlik binasını “Britaniya torpağında Fələstinin bir parçası” kimi xarakterizə edib. O, bu addımı “sülhün, ləyaqətin, qətiyyətin və Fələstin xalqının ədalət və azadlıq uğrunda davamlı mübarizəsinin simvolu” adlandırıb.

Zomlot səfirliyin açılmasını Britaniya–Fələstin münasibətlərində “tarixi an” və “dərin əhəmiyyətə malik mərhələ” kimi qiymətləndirərək, bunun Fələstin xalqının öz müqəddəratını təyinetmə yolunda mühüm hadisə olduğunu vurğulayıb. O bildirib ki, bu addım həm də Qəzza, İordan çayının qərb sahili və qaçqın düşərgələrində yaşayan fələstinlilər üçün dirəniş və milli kimliyin davamlılığı mesajıdır.

Səfir çıxışında Fələstin xalqının işğalın sona çatdırılması və qanuni hüquqlarının təmin olunması tələbinin beynəlxalq gündəmdə qalmaqda davam etdiyini də qeyd edib.

Xatırladaq ki, Böyük Britaniya hökuməti 20 sentyabr tarixində tarixi qərar qəbul edərək Fələstin Dövlətini müstəqil və suveren dövlət kimi tanıdığını elan edib. Böyük Britaniyanın baş naziri Keir Starmer bu qərarın London–Fələstin münasibətlərində “yeni mərhələnin əsasını qoyacağını” bəyan etmişdi.