BAKI,AzerVoice, Fərid Mikayılov

İsrail mətbuatı İsrail və ABŞ-nin Qəzza zolağında atəşkəs razılaşmasının ikinci mərhələsinə keçidlə bağlı razılıq əldə etdiyini iddia edib.

AzerVoice xəbər verir ki, sözügedən anlaşma Tel-Əvivin prosesi ləngitməsi səbəbindən son dövrlərdə yaranmış tıxanıqlığın aradan qaldırılması kimi qiymətləndirilir.

Bildirilir ki, İsrailin Baş naziri Benyamin Netanyahu Qəzza ilə bağlı razılaşmanın ikinci mərhələsinə keçidi nəzərdə tutan ABŞ administrasiyası ilə əldə olunan razılaşmalardan sonra Tel-Əvivə qayıdıb.

İkinci mərhələ çərçivəsində İsrailin yaxın vaxtlarda Rəfah Sərhəd Keçid Məntəqəsini açmağa hazırlaşması və Qəzza zolağının cənubundakı Rəfah bölgəsində, nə HƏMAS-ın, nə də İsrail ordusunun yerləşməyəcəyi yeni şəhərin salınması ilə bağlı hazırlıqların davam etdirilməsi nəzərdə tutulur.

Mənbələr həmçinin bu mərhələdə İsrail tərəfində müəyyən güzəştlərə getmək və kompromis axtarışları istiqamətində meyl müşahidə olunduğunu bildiriblər.

Əvvəl nə baş vermişdi?

Qəzza zolağında atəşkəs razılaşmasının birinci mərhələsi 10 oktyabrda qüvvəyə minib. Lakin İsrail Qəzzada bir əsgərinin əsir saxlanıldığını iddia edərək razılaşmanın bəzi bəndlərini pozub və ikinci mərhələyə keçidi gecikdirib.

Qeyd edək ki, razılaşma 8 oktyabr 2023-cü ildən başlayan və təxminən 71 min fələstinlinin həlak olmasına, 171 mindən çox insanın yaralanmasına səbəb olan İsrail hücumlarının dayandırılmasını hədəfləyirdi. Buna baxmayaraq, İsrail Qəzza zolağına qarşı blokada və hərbi pozuntuları davam etdirir.