BAKI, AzerVoice, Nailə Babazadə

İranda artan inflyasiya və iqtisadi çətinliklərə etiraz olaraq keçirilən aksiyalar zamanı son bir həftədə azı 16 nəfər həlak olub, yüzlərlə insan saxlanılıb. Etirazlar ölkənin müxtəlif bölgələrində təhlükəsizlik qüvvələri ilə nümayişçilər arasında toqquşmalarla müşayiət olunur.

AzerVoice xəbər verir ki, hüquq müdafiə təşkilatlarının məlumatına görə, etirazlar qərb vilayətləri ilə yanaşı paytaxt Tehran və cənub-şərqdə yerləşən Bəlucistan əyalətinə də yayılıb. Polis aksiyaların təşkilində rol oynadığı iddia edilən şəxslərin, xüsusilə sosial şəbəkələrdə fəal olanların saxlanıldığını açıqlayıb.

ABŞ Prezidenti Donald Tramp etirazçılara zorakılıq tətbiq olunacağı təqdirdə dəstək verə biləcəyini bəyan edib. İranın ali lideri Əli Xamenei isə ölkənin xarici təzyiqlərə boyun əyməyəcəyini bildirərək, iğtişaşlara qarşı sərt tədbirlərin görüləcəyini vurğulayıb.

Etirazların əsas səbəbi yüksək inflyasiya, milli valyuta rialın dəyər itirməsi və iqtisadi vəziyyətin ağırlaşması göstərilir.