BAKI,AzerVoice, Nailə Babazadə

Türkiyənin daxili işlər naziri Ali Yerlikaya FETÖ-yə qarşı aparılan əməliyyatlarla bağlı açıqlama verib. Nazir bildirib ki, son 20 gün ərzində keçirilən əməliyyatlar zamanı 223 şübhəli saxlanılıb, onlardan 87-si barəsində həbs qətimkan tədbiri seçilib.

AzerVoice xəbər verir ki, Ali Yerlikaya sosial şəbəkə hesabında paylaşdığı məlumatda qeyd edib ki, polis əməkdaşları tərəfindən FETÖ terror təşkilatına qarşı son 20 gündə ölkə üzrə genişmiqyaslı əməliyyatlar həyata keçirilib.

Nazirin sözlərinə görə, saxlanılan şəxslər arasında FETÖ-nün “məxfi strukturları” daxilində fəaliyyət göstərənlər, təşkilatın şifrəli rabitə proqramı ByLock istifadəçiləri, ankesörlü telefonlar vasitəsilə təşkilat üzvləri ilə əlaqə saxlayanlar, həmçinin təşkilata bağlı iş adamları üzərindən maliyyə dəstəyi təmin edən şəxslər yer alır.

Yerlikaya bildirib ki, saxlanılan 223 şübhəlidən 50-si barəsində məhkəmə nəzarəti tədbirləri tətbiq olunub, digər şəxslərlə bağlı istintaq prosesləri isə davam edir.

Əməliyyatlar Respublika Baş Prokurorluqları, Türkiyə Polis Baş İdarəsinin Terrorla Mübarizə (TEM), Qaçaqmalçılıq və Mütəşəkkil Cinayətkarlıqla Mübarizə (KOM) və Kəşfiyyat idarələrinin koordinasiyası ilə aparılıb. Təhlükəsizlik tədbirləri Antalya, Ankara, İstanbul, İzmir, Konya, Adana və daha 40-dan çox vilayəti əhatə edib. Əməliyyatlar zamanı barəsində qəti həbs hökmü və axtarış qərarı olan şəxslər də saxlanılıb.