HƏMAS bəyanatında Baş nazir Benyamin Netanyahunun Qəzza planının soyqırım və məcburi köçkünlük siyasətinin davamı olduğunu bildirib. Təşkilat Netanyahunun israilli məhbusları şəxsi maraqları və ifrat ideoloji gündəmi üçün qurban verdiyini vurğulayıb. HƏMAS həmçinin Qəzza xalqının işğala və qəyyumluq yaratmaq cəhdlərinə müqavimət göstərəcəyini, hücumların isə İsrail ordusuna baha başa gələcəyini bəyan edib.

Türkiyə Xarici işlər naziri Hakan Fidan sabah Misirə səfər edəcək. Nazir Fidanın bu səfər çərçivəsində Misir Prezidenti Sisinin onu qəbul edəcəyi də gözlənilir. Nazir Fidan sonuncu dəfə 2025-ci il martın 23-də İslam Əməkdaşlıq Təşkilatı (İƏT) – Ərəb Liqası (ƏL) Qəzza Əlaqə Qrupunun iclasında iştirak etmək məqsədilə Qahirəyə səfər etmişdi. Misirin xarici işlər naziri Əbdülati isə 2025-ci il fevralın 4-də ikitərəfli səfər çərçivəsində Türkiyəyə gəlmişdi.

Avstraliyanın xarici işlər naziri Penny Wong, İsrail Təhlükəsizlik Kabinetinin Baş nazir Benyamin Netanyahunun Qəzza şəhərini hərbi yolla ələ keçirmək planını təsdiqləməsindən sonra rəsmi Tel-Əvivi “bu addımdan çəkinməyə” çağırıb. O, bu qərarın Qəzzada mövcud humanitar böhranı daha da dərinləşdirəcəyini bildirib. “Davamlı sülhün təmin olunmasının yeganə yolu iki dövlətli həlldir — iki dövlətin beynəlxalq səviyyədə tanınmış sərhədlər daxilində sülh və təhlükəsizlik şəraitində yanaşı yaşaması”- deyə Penny Wong vurğulayıbş

ABŞ mərkəzli “Axios” portalı yazır ki, ilkin mərhələdə plan yalnız Qəzza şəhərini əhatə edəcək və qaçqın düşərgələrinə yayılmayacaq. Rəsmi mənbələr bildirir ki, məqsəd oktyabrın 7-dək şəhərdəki bütün mülki əhalini mərkəzi və ətraf bölgələrdəki qaçqın düşərgələrinə köçürmək, ardından isə HƏMAS üzvlərinə qarşı qurudan hücum başlamaqdır.

Bu gün baş vermiş əsas hadisələrin xronoloji xülasəsini təqdim edirik

Niderland hakimiyyəti yaxın vaxtlarda Fələstin dövlətini rəsmi şəkildə tanımağı planlaşdırmır. Bu fikri Niderland Krallığının xarici işlər naziri vəzifəsini icra edən Kaspar Veldkamp parlamentdə Qəzza zolağındakı humanitar vəziyyətlə bağlı keçirilən müzakirələr zamanı səsləndirib. “Hazırda Niderland Fələstini dövlət kimi tanımağı planlaşdırmır” - deyə, o bildirib. Debatlar zamanı bir neçə deputat hökumətə Fələstini tanımaq çağırışı edib. “Denk” Partiyasının nümayəndəsi Stefan van Baarle də daxil olmaqla bir sıra deputatlar İsrailə silah ixracının qadağan edilməsini də tələb ediblər.

Qəzzada baş verən soyqırım sona çatana qədər mübarizəmis davam edəcək. Bu sözləri Türkiyə Prezidenti Rəcəb Tayyib Ərdoğan Seneqal Prezidenti Usman Sonko ilə keçirdiyi birgə mətbuat konfransında deyib.

Ümumdünya Səhiyyə Təşkilatı (ÜST) 2025-ci ilin iyul ayında Qəzza zolağında kəskin qidalanma çatışmazlığından əziyyət çəkən uşaqların sayının rekord həddə çatdığını açıqlayıb. Bu barədə təşkilatın baş direktoru Tedros Adhanom Gebreyesus Cenevrədə keçirdiyi brifinqdə bildirib.

İsrailin Baş naziri Benyamin Netanyahu bildirib ki, ölkəsi Qəzza zolağını idarə etmək niyyətində deyil və bu ərazinin nəzarətini bölgədə təhlükə yaratmayan və yerli əhaliyə yaxşı həyat təmin edə biləcək ərəblərdən ibarət qüvvələrə vermək istəyir. Bu barədə Netanyahu Netanyahu “Fox News” telekanalına müsahibəsində danışıb.

Plan, İsrail qüvvələrinin hələ nəzarət etmədiyi, xüsusən də Qəzza şəhərinin xarabalıqları ətrafındakı sıx məskunlaşmış bölgələrə irəliləməsini və orada yaşayan fələstinli mülki şəxslərin cənub sahilindəki artıq dolu olan çadır düşərgələrinə məcburi köçürülməsini nəzərdə tutur. Analitiklər bu hərəkətin bölgədə humanitar vəziyyəti daha da ağırlaşdıracağı barədə xəbərdarlıq edirlər.

Qəzza Səhiyyə Nazirliyinin baş direktoru Munir əl-Burş "X" sosial media hesabında bir paylaşımda Qəzzada aclıqdan ölənlərlə bağlı məlumat paylaşıb. Məlumatda qeyd olunur ki, son 24 saatda biri uşaq olmaqla daha 4 fələstinli aclıqdan ölüb. Bununla da ölənlərin sayı 197-yə çatıb.

Türkiyə Qəzzaya humanitar yardımlarını davam etdirir. Türkiyə Fövqəladə Hallar və Fövqəladə Halların Rəhbərliyi (AFAD) 7 oktyabr 2023-cü ildən etibarən Qəzzaya ümumilikdə 101 min 271 ton humanitar yardımın çatdırıldığını açıqlayıb. Yardımlar 14 təyyarə və 16 gəmi ilə, həmçinin yerli təchizatla həyata keçirilib.

Fələstinə Dəstək Platforması İsrailin hücumlarına məruz qalan Qəzza xalqına dəstək məqsədilə 9 avqust tarixində Bəyazıt Meydanından Ayasofya məscidinə qədər yürüş təşkil edəcək. Platforma sosial media hesabında “Qəzzəyə ümid işığı ol!” başlığı ilə bütün vətəndaşları yürüşə qatılmağa çağırıb.

İsrail ordusunun Qəzza zolağının müxtəlif bölgələrinə bu səhər saatlarından bəri həyata keçirdiyi hücumlarda, aralarında qadın və uşaqların da olduğu 17 fələstinli həyatını itirib. Qəzzaya tətbiq etdiyi blokadanı sərtləşdirərək yardım girişini məhdudlaşdırmaqla humanitar fəlakətə səbəb olan İsrailin hədəfində yenə yardım almaq istəyən mülki şəxslər vardı. Səhiyyə mənbələri və hadisə şahidlərindən əldə edilən məlumatlara görə, İsrail ordusunun Qəzza şəhərində yerləşən Şati Qaçqınlar Düşərgəsində bir evi bombalaması nəticəsində biri qadın, biri uşaq olmaqla 3 fələstinli həyatını itirib.

Qəzza zolağına havadan atılan yardımlar, yerindən didərgin düşən insanların sığındığı çadırların üzərinə düşərək ölüm hallarına səbəb olur. Bu barədə Qəzzadakı Daxili İşlər Nazirliyinin yaydığı bəyanatda bildirilib.

İsrailin Baş naziri Benyamin Netanyahu sabah yerli vaxtla saat 18:00-da Təhlükəsizlik Kabinetinin iclasını keçirəcək. İsrail ordusunun Baş Qərargah rəisi Eyal Zamir və digər hərbi rəhbərlərin xəbərdarlıqlarına baxmayaraq, Təhlükəsizlik Kabinetinin Qəzzanın tam işğalı planına razılıq verəcəyi gözlənilir.

Qəzzadakı Fələstin hökuməti son 10 gündə ən azı 6 min yardım maşınının bölgəyə girməli olmasına baxmayaraq, yalnız 853 yardım maşınının Qəzza zolağından keçməsinə icazə verildiyini açıqlayıb.

Avropa Parlamentində (AP) təmsil olunan Sol, Yaşıllar və Sosialistlər və Demokratların İrəliyə Doğru İttifaqı (S&D) qruplarının liderləri Avropa İttifaqının (Aİ) yüksək vəzifəli rəsmilərinə ünvanladıqları ortaq məktubla, İsrailin Qəzza zolağında həyata keçirdiyi soyqırımı dayandırmaq üçün təcili tədbir görməyə çağırıblar.

İsrailin hücumları və sanksiyaları səbəbindən aclıq yaşanan Qəzza Zolağında son 24 saatda 5 fələstinli daha aclıqdan dünyasını dəyişib, aclıq səbəbindən ölənlərin sayı 193-ə çatıb. Qəzza Sağlamlıq Nazirliyinin baş direktoru Munir əl-Burş sosial media hesabında Qəzzada aclıqdan həyatını itirənlər barədə məlumat verib. İsrailin hücumları və humanitar yardımın girişini məhdudlaşdıran sərt blokadası altında olan Qəzza Zolağı aclığın yayıldığı, su, dərman, tibbi vasitələr və gigiyena mallarının çatışmadığı humanitar fəlakətlə üzləşib.

İsrail ordusunun 7 oktyabr 2023-cü ildən bəri Qəzza Zolağına təşkil etdiyi hücumlarda 19 minə yaxın müəllim və tələbənin həyatını itirdiyi bildirilib. Fələstin Təhsil və Ali Təhsil Nazirliyi 7 oktyabr 2023-dən 5 avqust 2025-ə qədərki dövrdə baş vermiş İsrail hücumlarının təhsil sektorunda yaratdığı dağıntılar, ölüm və yaralanmalarla bağlı hesabat yayıb. Hesabata görə, İsrailin işğal altında olan Fələstin torpaqları və Qətliamın baş verdiyi Qəzza Zolağındakı hücumlarda 18 min 685 müəllim və tələbə həyatını itirib, 32 min 399 nəfər isə yaralanıb.

İsrail mediasının məlumatına görə, Netanyahu Zamirdən Qəzza zolağının işğalı ilə bağlı planları yenidən işləyərək Nazirlər Kabinetinə təqdim etməyi tələb edib. Zamir isə planların artıq təqdim olunduğunu və əlavə risklərin nəzərə alınmalı olduğunu bildirib. Baş Qərargah rəisi bütün Qəzzanın işğalının İsrail üçün böyük təhlükə yaradacağını, girovların həyatı və ordunun mövqeyi baxımından riskləri artıracağını vurğulayıb.

Tramp həmçinin Yaxın Şərq üzrə xüsusi nümayəndəsi Stiv Vitkoffun Moskvada Rusiya tərəfi ilə görüş keçirəcəyini xatırladaraq, enerji tarifləri və digər geosiyasi məsələlərlə bağlı qərarların bu görüşdən sonra veriləcəyini bildirib. Ukrayna müharibəsinə münasibətində isə Tramp məsuliyyəti Co Baydenin üzərinə qoyaraq, “Bu müharibə mənim deyil, Baydenin müharibəsidir. Mən ABŞ-ı bu qarışıqlıqdan çıxarmaq üçün buradayam” deyib.

Vaşinqtonda fələstinliyə dəstək nümayişçiləri NBC, Fox News, MSNBC və The Hill kimi media qurumlarının ofislərinin yerləşdiyi küçədə aksiya keçiriblər. Etirazçılar “Medianın soyqırımda şərikliyini dayandırın” və “Media yalan danışır, Qəzza ölür” yazılı plakatlarla ABŞ mediasının Qəzzaya hücumlara yanaşmasını tənqid ediblər.

Qəzza zolağında İsrail ordusunun təhlükəli yola yönləndirdiyi humanitar yardım yük maşını yemək almağa çalışan fələstinlilərin üzərinə aşıb. Hadisə nəticəsində 20 nəfər ölüb, çox sayda insan yaralanıb. Qəzza hökumətinin media ofisi İsrailin yardımların bölgəyə girişini məhdudlaşdırmasının humanitar böhranı dərinləşdirdiyini və xaos yaratdığını bildirib