BAKI, Azervoice, Nərmin Ağayeva

İsrail Baş Qərargah rəisi Eyal Zamir ilə baş nazir Benyamin Netanyahu arasında Qəzza zolağının tam işğalı planı və hərbi strategiyalar mövzusunda gərgin müzakirə baş verib.

Azervoice xəbər verir ki, İsrail mediasının məlumatına görə, Netanyahu Zamirdən Qəzza zolağının işğalı ilə bağlı planları yenidən işləyərək Nazirlər Kabinetinə təqdim etməyi tələb edib. Zamir isə planların artıq təqdim olunduğunu və əlavə risklərin nəzərə alınmalı olduğunu bildirib. Baş Qərargah rəisi bütün Qəzzanın işğalının İsrail üçün böyük təhlükə yaradacağını, girovların həyatı və ordunun mövqeyi baxımından riskləri artıracağını vurğulayıb.

Görüş zamanı Netanyahunun oğlu Yair Netanyahu Zamiri “çevriliş planı”nda ittiham edib. Zamir bu iddiaya cavab olaraq “müharibənin ortasında belə hücumlara niyə məruz qaldığını” soruşub. “Plan qəbul olunmazsa istefa təhdidlərini qəbul etmirəm, oğlum isə yetkin bir insandır” - deyə Netanyahu isə cavab verib.

Netanyahunun ofisi görüşdən sonra verdiyi açıqlamada İsrail Müdafiə Qüvvələrinin cümə axşamı toplanacaq təhlükəsizlik kabinetinin qərarlarını icra etməyə hazır olduğunu bildirib. İsrail mənbələri Netanyahunun Qəzzanın tam işğalı planını dəstəklədiyini, Zamirin isə buna qarşı çıxdığını təsdiqləyib.

Qeyd edək ki, bu gərginlik ABŞ-ın Qəzzaya humanitar yardım səylərini genişləndirmək planı ilə eyni vaxta təsadüf edir. New York Times yazır ki, ABŞ prezidenti Donald Tramp və Yaxın Şərq üzrə xüsusi nümayəndə Stiv Vitkoff Ağ Evdə Qəzzaya yardım əməliyyatlarının nəzarətinin ABŞ-a keçməsi planlarını müzakirə ediblər. Tramp administrasiyası İsrailin yardım prosesini zəif idarə etdiyini, aclıq böhranının dərinləşdiyini bildirərək, Körfəz ölkələri, İordaniya və Misir ilə birlikdə əməliyyatlara rəhbərlik etməyə hazırlaşır.