BAKI, AzerVoice, Səməd Əyyubov – Ümumdünya Səhiyyə Təşkilatı (ÜST) 2025-ci ilin iyul ayında Qəzza zolağında kəskin qidalanma çatışmazlığından əziyyət çəkən uşaqların sayının rekord həddə çatdığını açıqlayıb.

AzerVoice-un məlumatına görə, bu barədə təşkilatın baş direktoru Tedros Adhanom Gebreyesus Cenevrədə keçirdiyi brifinqdə bildirib.

O qeyd edib ki, bu göstərici bir ay üzrə ən yüksək rəqəmdir.

Onun sözlərinə görə, iyul ayında Qəzzada beş yaşadək təxminən 12 min uşaq ağır qidalanma çatışmazlığından əziyyət çəkib.

“Bu, ÜST tarixində aylıq statistikalar baxımından ən yüksək göstəricidir” – deyə, Gebreyesus vurğulayıb.

O əlavə edib ki, bölgəyə çatdırılan ərzaq yardımı vəziyyətin pisləşməsinin qarşısını almaq üçün kifayət etmir.

ÜST-nin məlumatına əsasən, yanvarın əvvəlindən iyulun sonunadək azı 99 fələstinli aclıqdan həyatını itirib, onlardan 29-u beş yaşdan kiçik uşaqlardır. Gebreyesus real rəqəmlərin “daha yüksək” olduğunu bildirib.

Qəzzanın Səhiyyə Nazirliyi isə son məlumatlarında aclıq səbəbilə 193 nəfərin öldüyünü, onların 96-sının uşaq olduğunu açıqlayıb.

Xatırladaq ki, martın 2-dən etibarən Qəzzaya beynəlxalq humanitar yardım daxil olmur. İsrailin qərarı ilə bölgəyə giriş-çıxışa nəzarət edən bütün keçid məntəqələri bağlanıb. Hazırda ərzaq yardımı yalnız İsrail və ABŞ-ın nəzarətindəki “Qəzza Humanitar Yardım Fondu” vasitəsilə paylanır.

Mart ayında isə İsrail ordusu atəşkəsi pozaraq Qəzzada hərbi əməliyyatlara yenidən başlayıb. Qətər, Misir və ABŞ-ın vasitəçiliyi ilə aparılan danışıqlarda hələlik yeni atəşkəs razılaşmasına nail olunmayıb.