BAKI, Azervoice, Nərmin Ağayeva

HƏMAS, İsrailin Qəzzaya hücumları genişləndirmək qərarını danışıqlar prosesinə zərbə kimi qiymətləndirib.

Azervoice xəbər verir ki, HƏMAS bəyanatında Baş nazir Benyamin Netanyahunun Qəzza planının soyqırım və məcburi köçkünlük siyasətinin davamı olduğunu bildirib.

Təşkilat Netanyahunun israilli məhbusları şəxsi maraqları və ifrat ideoloji gündəmi üçün qurban verdiyini vurğulayıb. HƏMAS həmçinin Qəzza xalqının işğala və qəyyumluq yaratmaq cəhdlərinə müqavimət göstərəcəyini, hücumların isə İsrail ordusuna baha başa gələcəyini bəyan edib.

Xatırladaq ki, İsrail Təhlükəsizlik Kabineti baş nazir Netanyahunun Qəzza şəhərini işğal etmək planını təsdiqləyib. Yerli mənbələr ordunun yalnız Qəzza şəhərinə yönələn hücum planı hazırladığını, burada bütün mülki əhalinin oktyabrın 7-nə qədər zorla köçürüləcəyini bildirir. Hücumdan sonra şəhərdə qalan HƏMAS üzvlərinə qarşı qurudan əməliyyat aparılacaq və şəhər tam mühasirəyə alınacaq. Rəsmi sənədlərdə “işğal” ifadəsi əvəzinə “nəzarət” sözünün seçilməsi beynəlxalq hüquqi məsuliyyətdən yayınmaq cəhdi kimi qiymətləndirilir.

Qeyd edək ki, Netanyahu Nazirlər Kabinetinin iclasından əvvəl Fox News-a açıqlamasında “Qəzzanın hamısını nəzarətə götürməyi hədəfləyirik” deyib.