BAKI, Azervoice, Nərmin Ağayeva

İsrail Təhlükəsizlik Kabineti Qəzza şəhərinin “nəzarət altına alınması” planını təsdiqləyib

Azervoice xəbər verir ki, İsrail Təhlükəsizlik Kabineti baş nazir Benyamin Netanyahunun Qəzza şəhərini ələ keçirməyə yönələn təklifini təsdiqləyib. Yerli mənbələrə görə, İsrail ordusu Qəzza zolağının tam işğalına hazırlaşır.

ABŞ mərkəzli “Axios” portalı yazır ki, ilkin mərhələdə plan yalnız Qəzza şəhərini əhatə edəcək və qaçqın düşərgələrinə yayılmayacaq. Rəsmi mənbələr bildirir ki, məqsəd oktyabrın 7-dək şəhərdəki bütün mülki əhalini mərkəzi və ətraf bölgələrdəki qaçqın düşərgələrinə köçürmək, ardından isə HƏMAS üzvlərinə qarşı qurudan hücum başlamaqdır.

İsrailin “Yediot Aharonot” qəzeti yazır ki, hüquqi öhdəliklərdən yayınmaq üçün rəsmi sənədlərdə “işğal” əvəzinə “nəzarət” ifadəsinə üstünlük verilir. Qəzetə danışan yüksək rütbəli bir rəsmi isə “Niyyətimiz Qəzzanı işğal etməkdir, lakin hüquqi səbəblərlə ‘nəzarət’ ifadəsini işlədirik” deyib.

Qeyd edək ki, Netanyahu Fox News-a müsahibəsində İsrailin Qəzzanın hamısını nəzarət altına almağı hədəflədiyini bəyan edib.