BAKI, AzerVoice, Nailə Babazadə
Avropa Parlamentində (AP) təmsil olunan Sol, Yaşıllar və Sosialistlər və Demokratların İrəliyə Doğru İttifaqı (S&D) qruplarının liderləri Avropa İttifaqının (Aİ) yüksək vəzifəli rəsmilərinə ünvanladıqları ortaq məktubla, İsrailin Qəzza zolağında həyata keçirdiyi soyqırımı dayandırmaq üçün təcili tədbir görməyə çağırıblar.
AzerVoice xəbər verir ki,Qrupların liderləri tərəfindən Aİ Komissiyasının Prezidenti Ursula fon der Leyenə, Aİ Şurasının sədri Antonio Kostaya və Aİ-nin Xarici Siyasət və Təhlükəsizlik məsələləri üzrə ali nümayəndəsi Kaya Kallasa ünvanlanan məktubda Birliyin Qəzza və işğal altındakı digər Fələstin ərazilərindəki vəziyyət qarşısında hərəkətsiz qalması tənqid olunub.
Məktubda qeyd olunub ki, İsrail Qəzzədə aclığı “müharibə vasitəsi” kimi istifadə edir və 6 mindən çox yardım yük maşınının bölgəyə girişi əngəllənib.
İsrail hökumətinin Qəzza zolağının tamamını işğal etmə planlarından bəhs edilən məktubda bunun beynəlxalq hüquqa zidd olduğu vurğulanıb.
Bəyanatda, Qəzzədəki vəziyyətin artıq “adi bir fövqəladə hal” olmadığını, burada baş verənlərin soyqırımı təşkil etdiyinə dair açıq sübutların mövcud olduğu bildirilib və Aİ Komissiyası ilə Aİ Şurasının buna cavab verməkdə indiyədək uğursuz olduğu qeyd edilib.
Aİ-nin məsuliyyət daşıdığı və dərhal hərəkətə keçməsinin vacib olduğu vurğulanan məktubda belə deyilir:
“Daha çox gecikməyə dözümümüz yoxdur. Daha çox qan tökülməsinə dözümümüz yoxdur. Tarix kütləvi acılar və cəzasızlıqlar qarşısında səssiz qalmağı bağışlamayacaq.”
Sol, Yaşıllar və S&D qruplarının liderləri həmçinin Aİ-İsrail Tərəfdaşlıq Sazişinin dayandırılması, Təl-Əvivə qarşı genişmiqyaslı silah embarqosunun tətbiqi, beynəlxalq hüququ pozan israilli rəsmilərə qarşı sanksiyaların həyata keçirilməsi və İordan çayının qərb sahilindəki torpaq ələ keçirmə fəaliyyətləri ilə bağlı malların ticarətinin qadağan edilməsini tələb ediblər.
Qeyd edək ki, İsrailin 7 oktyabr 2023-cü ildən bu yana Qəzza zolağına qarşı həyata keçirdiyi hücumlarda indiyə qədər azı 61 min 20 fələstinli həyatını itirib, 150 min 671 nəfər isə yaralanıb.