BAKI, AzerVoice, Nailə Babazadə

İsrail ordusunun 7 oktyabr 2023-cü ildən bəri Qəzza Zolağına təşkil etdiyi hücumlarda 19 minə yaxın müəllim və tələbənin həyatını itirdiyi bildirilib.

AzerVoice xəbər verir ki, Fələstin Təhsil və Ali Təhsil Nazirliyi 7 oktyabr 2023-dən 5 avqust 2025-ə qədərki dövrdə baş vermiş İsrail hücumlarının təhsil sektorunda yaratdığı dağıntılar, ölüm və yaralanmalarla bağlı hesabat yayıb.

Hesabata görə, İsrailin işğal altında olan Fələstin torpaqları və Qətliamın baş verdiyi Qəzza Zolağındakı hücumlarda 18 min 685 müəllim və tələbə həyatını itirib, 32 min 399 nəfər isə yaralanıb.

Bu tələbələrin 16 min 385-i Qəzzada, 108-i isə Qərb Sahilində həyatını itirib.

Yaralanan tələbələrin sayı 25 min 132 olaraq qeydə alınıb. Yaralı tələbələrin 2 min 440-ı Qəzzada, qalanı isə Qərb Sahilindədir. Bundan başqa, Qərb Sahilində 370 tələbə həbs olunub.

Universitetlərdə də oxşar ağır itkilər yaşanıb. Həyatını itirən universitet tələbələrinin sayı min 240-dır ki, onların min 205-i Qəzza Zolağındandır.

Yaralanan universitet tələbələrinin sayı isə 2 min 732 nəfərdir. Bunların 2 min 51-i Qəzzada, qalan hissəsi isə Qərb Sahilində yaralanıb.

Müvafiq dövrdə Qəzzada 725, ümumilikdə isə 730 müəllim həlak olub; 3 min 80 müəllim Qəzzada, 3 min 101 müəllim isə yaralanıb.

Universitetlərdə isə tamamilə Qəzzadan olan 222 akademik və işçi heyəti həlak olub, min 417-si Qəzzadan olmaqla min 434 akademik yaralanıb.

İsrail 150-dən çox dövlət məktəbini tamamilə dağıdıb, 118 məktəb isə zərər görüb.

Birləşmiş Millətlər Təşkilatının (BMT) Yaxın Şərqdə Fələstin Qaçqınlarına Yardım və İnkişaf Agentliyinə (UNRWA) bağlı 93 məktəb də hücuma məruz qalıb.

Qəzzada 60-dan çox universitet binası tamamilə dağıdılıb, Qərb Sahilində isə 8 universitet zərər görüb.

İşğal altındakı Qərb Sahilində 152 məktəb dağıdılıb, 25 məktəbin isə təhsil fəaliyyəti dayandırılıb.