BAKI, AzerVoice, Səməd Əyyubov
İranın Qərbi Azərbaycan vilayətində yerləşən və dünyanın ən böyük duzlu göllərindən biri olan Urmiya gölü tamamilə quruyub.
AzerVoice-un məlumatına görə, İran mediasında yayımlanan peyk görüntülərində gölün izinə rast gəlinmir.
İranlı rəsmilər daha əvvəl xəbərdarlıq etmişdilər ki, quraqlığın davam etməsi və problemin həlli istiqamətində addımların atılmaması halında Urmiya gölü yay aylarının sonuna qədər tamamilə quruyacaq.
Quraqlıq səbəbindən 2003-cü ildən etibarən su səviyyəsi azalmağa başlayan Urmiya gölü 2013-cü ildə tamamilə quruma təhlükəsi ilə üz-üzə qalmışdı. Gölün bərpası isə keçmiş prezident Həsən Ruhanidən başlayaraq vəzifəyə gələn dövlət başçılarının əsas seçki vədlərindən biri olub.
Tehran rəhbərliyi gölü əvvəlki vəziyyətinə qaytarmaq üçün 6 milyard dollarlıq büdcə ilə ölkənin ən böyük ekoloji layihəsini işə salsa da, davam edən quraqlıq səbəbindən istənilən nəticə əldə olunmayıb.