BAKI, AzerVoice, Nailə Babazadə
Şimali Koreya lideri Kim Çen Inın dünən paytaxt Pxenyanda izlədiyi təlimdə hipersəsli raketin buraxıldığı bildirilib.
AzerVoice xəbər verir ki, Koreya Mərkəzi Xəbər Agentliyinin (KCNA) məlumatına görə, Şimali Koreya ordusuna bağlı “böyük atəş gücü hücum qrupuna” daxil olan alt bölmə “ölkənin müharibə çəkindirmə qabiliyyətini və silah sistemlərinin hazırlıq səviyyəsini sınaqdan keçirmək məqsədilə” dünən raket buraxılışı üzrə təlim keçirib.
Kim Çen Inın şəxsən nəzarət etdiyi təlim zamanı hipersəsli raket Pxenyandan şimal-şərq istiqamətinə buraxılıb və Yapon dənizindəki (Şərq dənizi) hədəfləri 1000 kilometr məsafədən vurub.
Kim açıqlamasında “Nüvə qüvvələrimizi faktiki olaraq müharibəyə hazır vəziyyətə gətirmək istiqamətində son dövrlərdə mühüm nailiyyətlər əldə edilib” ifadəsini işlədib.
Hücum potensialının daim inkişaf etdirilməsinin vacibliyini vurğulayan Kim, son dövrlərdəki geosiyasi böhranlara işarə edərək bu fəaliyyətlər vasitəsilə nüvə müharibəsinin çəkindirmə səviyyəsini mərhələli şəkildə yüksək səviyyəyə çatdırmağı hədəflədiklərini bildirib.
Cənubi Koreya və Yaponiya isə dünən Şimali Koreyanın Yapon dənizi (Şərq dənizi) istiqamətinə raket buraxdığını açıqlamışdı.