BAKI, AzerVoice, Nərmin Ağayeva
ABŞ Prezidenti Donald Tramp, Oval Ofisdə keçirdiyi mətbuat konfransında avtoritarizm ittihamlarına cavab verərək, “Mən diktator deyiləm, ağıllı insanam,” - deyə bildirib.
AzerVoice xəbər verir ki, Tramp, təxminən 80 dəqiqəlik konfransda immiqrasiya və təhlükəsizlik siyasətlərinə görə tənqidlərə məruz qalıb. Milli Qvardiyanın Vaşinqton küçələrinə yerləşdirilməsini müdafiə edərək, “Məni respublikaya hücumda ittiham edirlər, halbuki təbrik etməlidirlər,” - deyə o bildirib.
O, Müdafiə Nazirliyinin adını “Müharibə Departamenti” kimi dəyişdirmək planını açıqlayıb və bunun “qələbə tarixi” daşıdığını qeyd edib.
Tramp, ABŞ bayrağını yandıranlara bir il həbs cəzası tətbiq edən sərəncam imzalayıb. “Bayraq yandırmaq ifadə azadlığı deyil,” deyən Tramp, 1989-cu ildə ləğv edilmiş oxşar qanuna istinad edib.
Tramp, Cənubi Koreya prezidenti Li Jae-Myunqla görüşündə Şimali Koreya lideri Kim Çen Inla ilin sonunda görüşmək istədiyini də bildirib. 2019-cu ildə Kimlə hərbisizləşdirilmiş zonada görüşdüyünü xatırladan Tramp, “Onunla əla münasibətim var,” - deyə qeyd edib.
Qeyd edək ki, mətbuat konfransında Trampın əlindəki tünd qançırlar diqqət çəkib. Ağ Ev mətbuat katibi Karoline Leavitt, bunun Trampın minlərlə insanla əl sıxması və aspirin qəbulu nəticəsində yarandığını açıqlayıb. Trampa əvvəllər xroniki venoz çatışmazlıq diaqnozu qoyulduğu da qeyd edilib.
