BAKI, Azervoice, Nərmin Ağayeva

Cənubi Koreya və ABŞ Şimali Koreya təhdidinə qarşı genişmiqyaslı hərbi təlimlərə başlayacaq.

Azervoice xəbər verir ki, Cənubi Koreya və ABŞ bu ay Şimali Koreyanın artan təhlükəsi fonunda hazırlığı gücləndirmək məqsədilə illik Ulchi Freedom Shield adlı birgə hərbi təlimlərə start verəcək. Avqustun 18-də başlayacaq və 10 gün davam edəcək təlimlərdə təxminən 18 min Cənubi Koreya əsgərinin iştirak edəcəyi bildirilib. Təlimlər həm səhra, həm də komanda-qərargah simulyasiyalarını əhatə edəcək.

Təlimlərlə bağlı keçirilən mətbuat konfransında polkovnik Li Sung-jun və ABŞ Silahlı Qüvvələrinin Koreyadakı nümayəndəsi Rayan Donald bildirib ki, təlimin miqyası əvvəlki illərlə müqayisədə dəyişməyib. Cənubi Koreyanın yeni liberal prezidenti Li Jae Myung-un dialoqu təşviq etmək istədiyi deyilsə də, hərbi rəsmilər bu istiqamətdəki narahatlıqları təkzib ediblər.

Li əlavə edib ki, planlaşdırılmış 40 təlimin yarısı hava şəraiti səbəbindən sentyabr ayına təxirə salınacaq.

Qeyd edək ki, Şimali Koreya bu cür təlimləri tez-tez "işğal məşqi" adlandırır və cavab olaraq silah sınaqlarını artırır. Pxenyan ABŞ və Cənubi Koreya ilə diplomatik danışıqlara qayıtmaq çağırışlarını dəfələrlə rədd edib və son illərdə xarici siyasətdə Rusiyaya daha çox yaxınlaşıb.