BAKI, AzerVoice, Fərid Mikayılov
Şimali Koreya lideri Kim Çen In ABŞ və Cənubi Koreya ordularının ortaq hərbi təlimlərini kəskin tənqid edərək, ölkəsinin nüvə gücünü daha da genişləndirəcəyini bəyan edib.
AzerVoice xəbər verir ki, Cənubi Koreya və ABŞ ordularının hər il təşkil etdiyi genişmiqyaslı “Ulchi Azadlıq Qalxanı” təlimləri bazar günü başlayıb.
Müdafiə məqsədli elan edilən 11 günlük manevrlərdə 21 min əsgər, o cümlədən 18 min Cənubi Koreya hərbçisi iştirak edir. Təlimlər komanda mərkəzi simulyasiyaları və sahə məşqlərini əhatə edir.
Şimali Koreya hökuməti ABŞ və Cənubi Koreyanın nüvə və raket proqramını dayandırmaq üçün apardığı diplomatik cəhdləri dəfələrlə rədd edib. 2019-cu ildə ABŞ prezidenti Donald Tramp ilə keçirilən sammitin iflasa uğramasından sonra danışıqlar tamamilə dayanıb.
Son illərdə Pxenyanın nüvə proqramını sürətləndirməsi və Rusiyanın Ukraynadakı müharibəsi fonunda Moskva ilə yaxınlaşması gərginliyi daha da artırıb.
