BAKI,AzerVoice, Fərid Mikayılov
İran İslam İnqilabı Keşikçiləri Korpusunun (SEPAH) Baş Komandanı, general-mayor Məhəmməd Pakpur bildirib ki, Fars Körfəzi bölgəsində və ölkənin cənub sahillərində hər hansı düşmən hərəkəti sürətli və sarsıdıcı cavabla qarşılanacaq.
AzerVoice xəbər verir ki, Pakpur SEPAH Dəniz Qüvvələrini “mübahisəsiz strateji və caydırıcı güc” kimi dəyərləndirib və vurğulayıb ki, bu qüvvələr İranın düşmənlərinə güc nümayiş etdirərək Fars Körfəzi regionunda davamlı təhlükəsizliyi təmin edir.
General həmçinin İslam Respublikasının müdafiə-hücum doktrinası çərçivəsində SEPAH-ın yüksək döyüş, kəşfiyyat və əməliyyat hazırlığını qoruduğunu qeyd edib. O, düşmənlərə xəbərdarlıq edib ki, hər hansı aqressiya güclü və qəti cavabla nəticələnəcək.
“Fars Körfəzi, Hormuz Boğazı və İran adalarında hər hansı səhv hesablamaya qətiyyətli, sürətli, sarsıdıcı və peşman edici cavab veriləcək”- deyə Pakpur əlavə edib.