BAKI, AzerVoice, Orxan Qədirzadə
Tayvanda hərbi aviasiya insidenti baş verib. ABŞ istehsalı olan F-16 tipli döyüş təyyarəsi təlim uçuşu zamanı qəzaya uğrayaraq dənizə düşüb.
AzerVoice xəbər verir ki, Tayvan Hərbi Hava Qüvvələrinin açıqlamasına görə, “F-16V” modifikasiyalı qırıcı Ada ölkəsinin şimal-şərqində yerləşən Hualien vilayəti sahilləri yaxınlığında rutin təlim uçuşu həyata keçirərkən radarlardan itib və daha sonra dənizə düşdüyü təsdiqlənib.
Bildirilib ki, pilot qəza baş verməzdən əvvəl katapult mexanizmi vasitəsilə təyyarəni tərk edib. Hazırda itkin düşmüş pilotun tapılması üçün axtarış-xilasetmə əməliyyatı davam etdirilir.
Qeyd edək ki, Tayvanda son illərdə bənzər hərbi aviasiya qəzaları qeydə alınıb. Belə ki, 2022 və 2024-cü illərdə “Mirage 2000” tipli döyüş təyyarələri də qəza nəticəsində dənizə düşüb və hər iki halda pilotlar katapult mexanizmi ilə xilas olunublar.