İsrail Silahlı Qüvvələri Qəzza zolağına yeni zərbələr endirib. Bildirilib ki, səhər saatlarında İsrail qırıcıları Qəzza şəhərinin şərqində yerləşən Tuffah məhəlləsinin bir neçə hissəsini bombalayıb. Zərbələr nəticəsində yaşayış binalarına ziyan dəyib. Eyni zamanda İsrail hərbi helikopterləri Qəzza zolağının şimalında yerləşən Cəbəliyə fələstinli qaçqın düşərgəsinin şərq hissəsini intensiv atəşə tutub. Məlumata görə, hücum zamanı iriçaplı pulemyotlardan istifadə olunub.

Türkiyə Prezident Administrasiyasının Kommunikasiya idarəsinin rəhbəri Burhanettin Duran BMT Təhlükəsizlik Şurasının 2803 saylı qərarı ilə ABŞ Prezidenti Donald Tramp tərəfindən açıqlanan Qəzza münaqişəsinə son qoymaq üçün Kompleks Planın dəstəklənməsinə qərar verildiyini xatırladıb. Bu çərçivədə Qəzzada təhlükəsizliyin təmin edilməsi və bölgənin yenidən qurulmasından məsul olacaq Sülh Şurası və müvafiq qurumların təsis edildiyi bildirilib.

İsrailin müdafiə naziri Yisrael Katz, "The New York Times" qəzetinin peyk görüntülərinə əsaslanaraq hazırladığı araşdırmadan sonra qalmaqallı açıqlama ilə çıxış edib. Nazir, 10 oktyabrda qüvvəyə minən atəşkəs rejiminə baxmayaraq, Qəzza zolağında 2500-dən çox binanı və geniş kənd təsərrüfatı sahələrini məhv edən İsrail ordusunu açıq şəkildə təbrik edib.

İsrailin atəşkəsə baxmayaraq humanitar yardımın girişini məhdudlaşdırdığı Qəzza zolağında daha bir uşaq ölümü qeydə alınıb. Xan Yunis şəhərində 27 günlük körpə kəskin soyuq hava şəraiti səbəbindən həyatını itirib. Səhiyyə mənbələrindən verilən məlumata görə, Aişə Ayiş əl-Ağa adlı 27 günlük körpə bu gün Xan Yunisdə şiddətli soyuq səbəbindən dünyasını dəyişib. Körpənin ölümü ilə birlikdə, qış mövsümünün başlanğıcından bu yana Qəzza zolağında həddindən artıq soyuq səbəbilə həyatını itirən uşaqların sayı 8-ə çatıb.

ABŞ prezidenti Donald Tramp Qəzza üzrə atəşkəs razılaşmasının ikinci mərhələsinin başlanması fonunda HƏMAS-a qarşı yeni və sərt tələblər irəli sürüb. Donald Tramp sosial şəbəkə paylaşımında HƏMAS-ın dərhal silahsızlanmalı olduğunu bəyan edib və qrupla bağlı hədələyici ifadələr işlədib. ABŞ prezidenti HƏMAS-dan son israilli girovun cəsədinin təxirəsalınmadan İsrailə qaytarılmasını tələb edib və silahsızlanmanın “ya asan, ya da çətin yolla” həyata keçiriləcəyini bildirib.

İsrail ordusunun atəşkəs razılaşmasına baxmayaraq Qəzza zolağında davam etdirdiyi hücumlar nəticəsində Xan Yunus şəhərində bir mülki vətəndaş həlak olub. Xəstəxanadan alınan məlumata görə, İsrail hərbçilərinin Xan Yunus şəhərində açdığı atəş nəticəsində 62 yaşlı Sabah Əhməd Əli Cami dünyasını dəyişib, bir neçə fələstinli isə müxtəlif dərəcəli xəsarətlər alıb. Hadisə şahidləri bildiriblər ki, İsrail ordusu atəşkəs çərçivəsində geri çəkildiyi Xan Yunusun şərq və qərb hissələrindən qaçqınların sığındığı çadır düşərgələrinə pilotsuz uçuş aparatları vasitəsilə intensiv zərbələr endirib.

ABŞ prezidenti Donald Tramp Qəzza zolağında sülhün təmin olunması məqsədilə yeni beynəlxalq mexanizmin formalaşdırıldığını açıqlayıb. ABŞ prezidenti Donald Tramp sosial şəbəkə hesabında yaydığı bəyanatda Qəzzada Sülh Şurasının yaradıldığını və qurumun üzvlərinin yaxın vaxtlarda açıqlanacağını bildirib. O, bu şuranın indiyədək formalaşdırılmış ən böyük və ən nüfuzlu beynəlxalq qurumlardan biri olacağını vurğulayıb.

HƏMAS-ın yüksək rütbəli rəsmisi Bəssam Naim müharibədən sonrakı Qəzzanı idarə etmək üçün texnokratik komitənin yaradılmasını müsbət addım kimi qiymətləndirib. Misirin vasitəçiliyi ilə elan edilən 15 nəfərlik Fələstin texnokratik komitəsi ABŞ Prezidenti Donald Trampın rəhbərlik edəcəyi "Sülh Şurası"nın nəzarəti altında fəaliyyət göstərəcək. Bəssam Naim bildirib ki, bu komitənin qurulması atəşkəsin möhkəmləndirilməsi, müharibənin yenidən başlamasının qarşısının alınması və humanitar böhranın həlli üçün həlledici əhəmiyyət kəsb edir. O, HƏMAS-ın Qəzza zolağının idarəçiliyini milli keçid komitəsinə təhvil verməyə və onun fəaliyyətinə şərait yaratmağa hazır olduğunu vurğulayıb.

İsrail ordusunun Qəzza zolağında davam etdiyi hücumlar nəticəsində həyatını itirən fələstinlilərin sayı 71 min 441-ə yüksəlib. Qəzzadakı Səhiyyə Nazirliyi İsrailin hücumları nəticəsində yaşanan can itkilərinə dair son məlumatları açıqlayıb. Verilən məlumata görə, 2023-cü ilin oktyabr ayından bəri davam edən hərbi əməliyyatlar zamanı yaralananların ümumi sayı isə 171 min 329 nəfərə çatıb.

Türkiyənin xarici işlər naziri Hakan Fidan media nümayəndələri ilə keçirdiyi qiymətləndirmə görüşündə İran ətrafında yaranmış vəziyyətə və rəsmi Ankara üçün bu ölkənin əhəmiyyətinə dair mühüm açıqlamalar verib. Hakan Fidan Türkiyənin İrana qarşı hər hansı hərbi müdaxiləyə qəti şəkildə qarşı olduğunu bildirib. O qeyd edib ki, İran öz daxili problemlərini özü həll etməli və bölgənin qaldıra bilməyəcəyi genişmiqyaslı qeyri-sabitlik ssenarilərindən qaçınılmalıdır. Nazir Türkiyənin İranla əsrlərə dayanan sabit sərhədə və sıx ticari-sosial əlaqələrə malik olduğunu xatırladaraq bu ölkədə baş verən hər bir hadisənin Türkiyəni birbaşa maraqlandırdığını vurğulayıb.

Türkiyə Respublikasının vitse-prezidenti Cevdet Yılmaz ABŞ-ın Ankaradakı səfiri Tom Barrakı qəbul edib. Görüşdə Türkiyə ilə ABŞ arasında ikitərəfli münasibətlərin daha da gücləndirilməsi və əməkdaşlığın konkret sahələr üzrə dərinləşdirilməsi məsələləri müzakirə olunub. Yılmaz bildirib ki, danışıqlar zamanı iqtisadi və ticarət əlaqələrinin inkişaf etdirilməsi istiqamətində atıla biləcək addımlar ətrafında fikir mübadiləsi aparılıb.

ABŞ administrasiyası Qəzzada atəşkəs planının ikinci mərhələsinə keçildiyini açıqlayıb. Bu mərhələ HƏMAS-ın tərksilah edilməsi, müharibədən ciddi zərər görmüş ərazinin bərpası və Qəzzanın idarəçiliyini həyata keçirəcək fələstinli texnokratlardan ibarət müvəqqəti qurumun yaradılmasını nəzərdə tutur. ABŞ Prezidenti Donald Trampın Yaxın Şərq üzrə xüsusi nümayəndəsi Stiv Uitkoff bildirib ki, Tramp administrasiyasının vasitəçiliyi ilə əldə olunan razılaşma iki illik müharibədən sonra yeni mərhələyə daxil olub. Onun sözlərinə görə, bu mərhələdə Qəzzada texnokrat hökumət formalaşdırılacaq və proses ABŞ nəzarəti altında həyata keçiriləcək.

Qəzza sektorunu idarə edəcək müvəqqəti komitənin tərkibi ilə bağlı bütün tərəflər arasında razılıq əldə olunub. Bunu Misirin xarici işlər naziri Abdel Ati açıqlayıb. Nazirin sözlərinə görə, komitə bütün fələstinli fraksiyalar tərəfindən dəstəklənən 15 nəfərdən ibarət olacaq. Yaxın vaxtlarda strukturun rəsmi şəkildə elan ediləcəyi və Qəzzada gündəlik həyatın təşkili, eləcə də əsas xidmətlərin təmin olunması istiqamətində fəaliyyətə başlayacağı gözlənilir.

Fələstindəki məlumatlı mənbələr Qəzza zolağını müvəqqəti idarə edəcək texnokratlar komitəsinin əksər üzvləri barədə razılığın əldə olunduğunu bildiriblər. 18 nəfərdən ibarət olacaq komitənin tərkibinə Qəzzada yaşayan iş adamları, akademiklər və vətəndaş cəmiyyəti fəalları daxildir. Təsdiqlənmiş üzvlərə çərşənbə günü Misirin paytaxtı Qahirəyə yollanmaq barədə məlumat verilib. Bildirilir ki, siyahıda Fələstin Muxtariyyətinin Nəqliyyat Nazirliyinin keçmiş katibi Əli Şaat, mühəndis Bəşir ər-Rayyes, Fələstin Tibbi Yardım Cəmiyyətinin direktoru Aed Yaği və Fələstin Universitetinin prezidenti Caber əl-Daour kimi tanınmış şəxslər yer alıb.

Bu gün sübh namazına qalxanda balaca oğlum Osmanın məsum yatışına baxdım. Daha sonra İranda müharibə olmasını səbirsizlik ilə gözləyən insanlar göz önümə gəldi. Müharibə harada olur olsun dəhşət və qırğın deyilmi? Qopmuş bədənlər, yetim qalmış uşaqlar, ana atasını itirmiş ortalıqda qalan körpələr deyilmi? Xaos deyilmi? Qəzza göz önündə olmadımı? Suriya on dörd il zülm zillət yaşamadımı? İraqda insanlar işgəncə görmədimi? Bunun siyasət tərəfini demirəm. Mən də bununla bağlı gündə bir neçə müsahibə verirəm, insan olma tərəfini deyirəm. Nə üçün evində yatan körpələrin üzərinə bombalar yağsın? Nə üçün iffətlər korlansın? Heç bir ölkə daxilində iqtisadi problemlər xarici müdaxilə ilə həll edilməyib?

Birləşmiş Millətlər Təşkilatının Uşaq Fondunun (UNICEF) sözçüsü Ceyms Elder Qəzzada təxminən üç aydır davam edən atəşkəs rejiminə baxmayaraq 100-dən çox uşağın öldürüldüyünü açıqlayıb. BMT-nin Cenevrə ofisində keçirilən həftəlik mətbuat konfransına onlayn qatılan Elder Qəzzadakı vəziyyəti dəyərləndirib. Onun sözlərinə görə, 19 oktyabr 2025-ci ildə başlayan atəşkəsdən bəri hər gün orta hesabla bir uşaq həyatını itirib. Elder atəşkəs dövründə bombardmanların və hücumların tam dayanmadığını, Qəzzada həyatın uşaqlar üçün boğucu olmağa davam etdiyini vurğulayıb.

Qəzza zolağında didərgin düşmüş fələstinlilər üçün qurulan 135 min çadırdan 127 mininin ağır qış şərtləri səbəbindən sığınacaq üçün yararsız hala gəldiyi açıqlanıb. Qəzzadakı Hökumətin Medya Ofisinin rəhbəri İsmayıl əs-Sevabite bölgədəki ailələrin köhnəlmiş çadırlarda və təcrid olunmuş ərazilərdə yaşadığını bildirib. O qeyd edib ki, ərazidə qütb mənşəli kəskin soyuqların təsiri nəticəsində çadırların böyük əksəriyyəti öz funksiyasını itirib. Hazırda bölgədə yorğan, döşək və sığınacaq böhranı boğucu həddə çatıb.

Livanın cənubunda gərginlik artmaqda davam edir. Analitiklər hesab edirlər ki, İsrailin son dövrlər həyata keçirdiyi intensiv hücumlar Baş nazir Benyamin Netanyahunun həm Qəzza cəbhəsində, həm də daxili siyasi müstəvidə artan təzyiqlərdən yayınmaq cəhdi ilə birbaşa bağlıdır. Son günlər Sidqin, Ayn əl-Ədisə və Bint Cübeyl bölgələrində pilotsuz uçuş aparatları və ağır artilleriya vasitəsilə həyata keçirilən zərbələr İsrailin planlı eskalasiya siyasətinə işarə edir. Hücumlar həm Hizbullah-a, həm də beynəlxalq ictimaiyyətə strateji mesaj xarakteri daşıyır.

Qəzza zolağının cənubundakı Xan Yunis şəhərində HƏMAS-ın yüksək rütbəli polis zabiti silahlı hücum nəticəsində öldürülüb. HƏMAS-a bağlı Daxili İşlər Nazirliyinin yaydığı məlumata görə, naməlum şəxslər hərəkətdə olan avtomobildən atəş açaraq Xan Yunis cinayət axtarış şöbəsinin rəisi Mahmud əl-Astalı qətlə yetiriblər. HƏMAS rəhbərliyi bu hücumda "İsrail əməkdaşlarını" ittiham edib. Hücumun məsuliyyətini Xan Yunisin şərqində, İsrailin nəzarəti altındakı bölgədə fəaliyyət göstərən anti-HƏMAS qruplaşmasının lideri Hüsam əl-Astal öz üzərinə götürüb. O, sosial şəbəkə hesabında paylaşdığı videoda HƏMAS ilə əməkdaşlıq edənləri hədələyərək hücumların davam edəcəyini bildirib. İsrail hərbi rəsmiləri isə ərazidə hər hansı əməliyyatdan xəbərsiz olduqlarını bəyan ediblər.

HƏMAS hərəkatının rəhbərliyi yanvar ayının ilk on günlüyündə keçirilməsi planlaşdırılan Siyasi Şura rəhbəri seçkilərini təxirə salmaq barədə qərar qəbul edib. Asharq Al-Awsat" qəzetinə danışan hərəkat daxilindəki yüksək rütbəli mənbələr səsvermənin "növbəti bildirişə qədər" təxirə salındığını bildiriblər. Yeni tarix hələ müəyyən edilməsə də, seçkilərin hər an keçirilə biləcəyi qeyd olunub. Mənbələrdən biri təxirə salınma səbəbini regiondakı təhlükəsizlik və siyasi şərait, eləcə də hərəkatın hazırda ABŞ və regional vasitəçilərin iştirakı ilə davam edən atəşkəsin ikinci mərhələsi üzrə danışıqlara fokuslanması ilə əlaqələndirib. Bununla yanaşı, Qəzza zolağında təşkilati tənzimləmələrlə bağlı daxili fikir ayrılıqlarının da qərara təsir etdiyi vurğulanır.

İsrail ordusu əldə olunmuş atəşkəs razılaşmasına məhəl qoymayaraq, Qəzza zolağının müxtəlif nöqtələrinə artilleriya və hava zərbələri endirməkdə davam edir. Yerli mənbələrdən alınan məlumata görə, İsrail ordusuna məxsus hərbi texnikalar Qəzzanın cənubundakı Xan Yunis şəhərinin şərq hissəsini atəşə tutub. Eyni zamanda, Rəfah şəhərinin qərbində yerləşən Mevasi bölgəsinin cənub hissəsi də artilleriya atəşinə məruz qalıb.

Atəşkəsə baxmayaraq, İsrailin Qəzza zolağının müxtəlif bölgələrinə hücumları nəticəsində iki fələstinli həlak olub, çoxlu sayda insan yaralanıb. 38 yaşlı fələstinli Məhəmməd Xalid Məhəmməd əl-Kəhvəci Qəzzanın cənubundakı Xan Yunisin Beni Suheila bölgəsində İsrail pilotsuz təyyarəsinin hədəfinə çevrildikdən sonra həlak olub. Şahidlər bildiriblər ki, İsrail pilotsuz təyyarəsi Kəhvəcinin yerləşdiyi əraziyə bomba atıb və nəticədə onun ölümü ilə nəticələnib.

20-dən çox ölkə Somalinin suverenliyini və ərazi bütövlüyünü bir daha təsdiqləyərək, İsrailin xarici işlər nazirinin Somalinin separatçı bölgəsi olan Somalilanda səfərini qanunsuz adlandırıb. Bu barədə cümə günü yayımlanan birgə bəyanatda qeyd olunub. Bəyanata imza atan 21 ölkə bunlardır: Səudiyyə Ərəbistanı, Əlcəzair, Banqladeş, Komor adaları, Cibuti, Misir, Qambiya, İndoneziya, İran, İordaniya, Küveyt, Liviya, Maldiv adaları, Nigeriya, Oman, Pakistan, Fələstin, Qətər, Somali, Sudan və Türkiyə. Həmçinin, müsəlman ölkələrinin böyük əksəriyyətini təmsil edən İslam Əməkdaşlıq Təşkilatı da bəyanatı dəstəkləyib.

İsrail ordusunun Qəzza zolağına həyata keçirdiyi hücumlar nəticəsində həlak olanların sayının 71 min 409 nəfərə yüksəldiyi bildirilib. Qəzzadakı Səhiyyə Nazirliyi tərəfindən yayımlanan yazılı açıqlamada İsrailin hücumları nəticəsində qeydə alınan itkilər və dağıntılar altından çıxarılan yeni cəsədlərlə bağlı son məlumatlar paylaşılıb. Məlumata görə, İsrail hücumları nəticəsində həyatını itirən 14 fələstinlinin nəşi xəstəxanalara çatdırılıb, hücumlar zamanı 17 nəfər yaralanıb.