BAKI, AzerVoice, Orxan Qədirzadə

20-dən çox ölkə Somalinin suverenliyini və ərazi bütövlüyünü bir daha təsdiqləyərək, İsrailin xarici işlər nazirinin Somalinin separatçı bölgəsi olan Somalilanda səfərini qanunsuz adlandırıb. Bu barədə cümə günü yayımlanan birgə bəyanatda qeyd olunub.

AzerVoice xəbər verir ki, birgə bəyanatda İsrailin Somalilanda müstəqil dövlət kimi tanıması rədd edilib və Tel-Əviv rəhbərliyi bu qərarı dərhal geri götürməyə çağırılıb. Sənəddə vurğulanıb ki, Somalinin ərazi bütövlüyü beynəlxalq hüququn əsas prinsiplərindən biridir və onun pozulması regionda onsuz da həssas olan təhlükəsizlik vəziyyətini daha da gərginləşdirə bilər.

Bəyanata imza atan 21 ölkə bunlardır: Səudiyyə Ərəbistanı, Əlcəzair, Banqladeş, Komor adaları, Cibuti, Misir, Qambiya, İndoneziya, İran, İordaniya, Küveyt, Liviya, Maldiv adaları, Nigeriya, Oman, Pakistan, Fələstin, Qətər, Somali, Sudan və Türkiyə. Həmçinin, müsəlman ölkələrinin böyük əksəriyyətini təmsil edən İslam Əməkdaşlıq Təşkilatı da bəyanatı dəstəkləyib.

Sənəddə İsrailin xarici işlər nazirinin Somalilanda səfəri qəti şəkildə pislənib. Bildirilib ki, separatçı gündəmlərin təşviqi yolverilməzdir və bu cür addımlar Afrika Buynuzu regionunda gərginliyi artırmaq riski daşıyır. Eyni zamanda, Somalinin beynəlxalq hüquqa sadiqliyi və sülh yolu ilə əməkdaşlıq siyasəti müsbət qiymətləndirilib.

İsrail tərəfi isə səfərdən sonra Somalilandla münasibətlərin inkişaf etdirilməsində qərarlı olduğunu açıqlayıb və Somaliland liderinin İsrailə rəsmi səfərə dəvət olunduğunu bildirib.

Bununla yanaşı, Somaliland rəsmiləri İsrailin tanınmasının bölgədə hərbi baza yaradılmasına və ya Qəzzadan olan fələstinlilərin köçürülməsinə imkan verəcəyi iddialarını təkzib edib. İsrail rəsmiləri isə Qəzza ilə bağlı “könüllü miqrasiya” ideyasını gündəmdə saxlayır.