BAKI, AzerVoice, Nailə Babazadə

Birləşmiş Millətlər Təşkilatının Uşaq Fondunun (UNICEF) sözçüsü Ceyms Elder Qəzzada təxminən üç aydır davam edən atəşkəs rejiminə baxmayaraq 100-dən çox uşağın öldürüldüyünü açıqlayıb.

AzerVoice xəbər verir ki, BMT-nin Cenevrə ofisində keçirilən həftəlik mətbuat konfransına onlayn qatılan Elder Qəzzadakı vəziyyəti dəyərləndirib. Onun sözlərinə görə, 19 oktyabr 2025-ci ildə başlayan atəşkəsdən bəri hər gün orta hesabla bir uşaq həyatını itirib. Elder atəşkəs dövründə bombardmanların və hücumların tam dayanmadığını, Qəzzada həyatın uşaqlar üçün boğucu olmağa davam etdiyini vurğulayıb.

Bölgədəki uşaqların həm də ağır qış şəraiti ilə mübarizə apardığını qeyd edən UNICEF rəsmisi son bir neçə gündə hipotermiya (donma) səbəbindən ölənlərin olduğunu bildirib. Məlumata görə, bu qış donma nəticəsində həyatını itirən uşaqların sayı 6-ya yüksəlib. Elder Qəzzada atəşkəsin tam tətbiq olunması, humanitar yardımlara qeyri-məhdud çıxışın təmin edilməsi və uşaqlar üçün "real təhlükəsizlik" mühitinin yaradılması üçün beynəlxalq birliyə çağırış edib.

Qeyd edək ki, 2023-cü ilin oktyabrından bəri İsrailin Qəzza zolağına təşkil etdiyi hücumlarda 71 mindən çox fələstinli həyatını itirib, 171 mindən çox insan isə yaralanıb. Bölgədəki mülki infrastrukturun 90 faizinin məhv edildiyi və minlərlə cənazənin hələ də dağıntılar altında qaldığı bildirilir.