BAKI, AzerVoice, Orxan Qədirzadə

İsrail Silahlı Qüvvələri Qəzza zolağına yeni zərbələr endirib.

AzerVoice xəbər verir ki, yerli mənbələrin məlumatına görə, İsrail ordusu Qəzza zolağının müxtəlif bölgələrinə döyüş aviasiyası, hərbi helikopterlər və artilleriya qurğuları ilə hücumlar həyata keçirib. Hücumlar yaşayış məntəqələrini də əhatə edib.

Bildirilib ki, səhər saatlarında İsrail qırıcıları Qəzza şəhərinin şərqində yerləşən Tuffah məhəlləsinin bir neçə hissəsini bombalayıb. Zərbələr nəticəsində yaşayış binalarına ziyan dəyib.

Eyni zamanda İsrail hərbi helikopterləri Qəzza zolağının şimalında yerləşən Cəbəliyə fələstinli qaçqın düşərgəsinin şərq hissəsini intensiv atəşə tutub. Məlumata görə, hücum zamanı iriçaplı pulemyotlardan istifadə olunub.

Qəzza zolağının mərkəzində İsrail aviasiyası Deyr əl-Bələh şəhərinin şərqində yerləşən ərazilərə bir neçə hava zərbəsi endirib. Yerli mənbələr dağıntıların qeydə alındığını bildirir.

Zolağın cənub hissəsində isə İsrail helikopterləri və zirehli texnikası Xan Yunus şəhərinin şərqində, həmçinin Rəfah şəhərinin şimalında intensiv atəş açıb.

Qeyd olunur ki, bu hücumlar 10 oktyabr tarixində qüvvəyə minmiş atəşkəs razılaşmasının növbəti dəfə pozulması kimi qiymətləndirilir. Hücumlar ABŞ administrasiyasının atəşkəs razılaşmasının ikinci mərhələsinin başlandığını bəyan etməsinə baxmayaraq davam edir.

HƏMAS hərəkatının nümayəndəsi Hazim Qasım daha əvvəl İsrailin atəşkəs şərtlərini mütəmadi pozmasını pisləyərək vasitəçiləri Təl-Əvivə təzyiq göstərməyə çağırıb.

Qəzza zolağı hakimiyyətinin 15 yanvar tarixində yaydığı məlumata görə, atəşkəsin birinci mərhələsi çərçivəsində İsrail tərəfindən 1244 pozuntu qeydə alınıb.