BAKI, AzerVoice, Nailə Babazadə

İsrail ordusunun atəşkəs razılaşmasına baxmayaraq Qəzza zolağında davam etdirdiyi hücumlar nəticəsində Xan Yunus şəhərində bir mülki vətəndaş həlak olub.

AzerVoice xəbər verir ki, xəstəxanadan alınan məlumata görə, İsrail hərbçilərinin Xan Yunus şəhərində açdığı atəş nəticəsində 62 yaşlı Sabah Əhməd Əli Cami dünyasını dəyişib, bir neçə fələstinli isə müxtəlif dərəcəli xəsarətlər alıb. Hadisə şahidləri bildiriblər ki, İsrail ordusu atəşkəs çərçivəsində geri çəkildiyi Xan Yunusun şərq və qərb hissələrindən qaçqınların sığındığı çadır düşərgələrinə pilotsuz uçuş aparatları vasitəsilə intensiv zərbələr endirib.

Eyni zamanda İsrail aviasiyasının Qəzza şəhərinin şimalındakı şərq məhəllələrinə də hava hücumları təşkil etdiyi və bölgədəki çox sayda evi partlayıcılarla dağıtdığı bildirilir. Atəşkəs şərtlərinin pozulması ilə müşayiət olunan bu hücumlar bölgədəki humanitar vəziyyəti daha da gərginləşdirib. Rəsmi qurumlar mülki əhali arasında itkilərin artmasından ciddi narahatlıq ifadə edirlər.