BAKI, AzerVoice, Nailə Babazadə

Qəzza zolağında didərgin düşmüş fələstinlilər üçün qurulan 135 min çadırdan 127 mininin ağır qış şərtləri səbəbindən sığınacaq üçün yararsız hala gəldiyi açıqlanıb.

AzerVoice xəbər verir ki, Qəzzadakı Hökumətin Medya Ofisinin rəhbəri İsmayıl əs-Sevabite bölgədəki ailələrin köhnəlmiş çadırlarda və təcrid olunmuş ərazilərdə yaşadığını bildirib. O qeyd edib ki, ərazidə qütb mənşəli kəskin soyuqların təsiri nəticəsində çadırların böyük əksəriyyəti öz funksiyasını itirib. Hazırda bölgədə yorğan, döşək və sığınacaq böhranı boğucu həddə çatıb.

Sevabite bildirib ki, yerindən edilmiş fələstinlilərin istilik sistemlərinə və isti geyimlərə olan ehtiyacı 70 faizdən çoxdur. Bu böhranın İsrailin apardığı genişmiqyaslı dağıntı siyasətinin birbaşa nəticəsi olduğunu vurğulayan rəsmi infrastrukturun təxminən 90 faizinin məhv edildiyini diqqətə çatdırıb. Məlumata görə, 2 milyondan çox insan didərgin düşüb və 288 mindən çox ailə tamamilə sığınacaqsız qalıb.

Hökumət rəsmisi həmçinin əlavə edib ki, İsrail ordusu indiyədək 303 sığınacaq mərkəzini və 61 qida paylama məntəqəsini bombalayıb. Soyuq hava və sığınacaq çatışmazlığı on minlərlə insanın tənəffüs yolları və yoluxucu xəstəliklərə tutulmasına səbəb olub. Bölgədə 38 xəstəxananın dağıdılması və 96 sağlamlıq mərkəzinin fəaliyyətini dayandırması xəstələrə tibbi müdaxiləni qeyri-mümkün edir və ölüm riskini artırır. Sevabite beynəlxalq birliyi qış fəslində kütləvi ölümlərin qarşısını almaq üçün təcili hərəkətə keçməyə çağırıb.