BAKI, AzerVoice, Nailə Babazadə

İsrailin atəşkəsə baxmayaraq humanitar yardımın girişini məhdudlaşdırdığı Qəzza zolağında daha bir uşaq ölümü qeydə alınıb. Xan Yunis şəhərində 27 günlük körpə kəskin soyuq hava şəraiti səbəbindən həyatını itirib.

AzerVoice xəbər verir ki, səhiyyə mənbələrindən verilən məlumata görə, Aişə Ayiş əl-Ağa adlı 27 günlük körpə bu gün Xan Yunisdə şiddətli soyuq səbəbindən dünyasını dəyişib.

Körpənin ölümü ilə birlikdə, qış mövsümünün başlanğıcından bu yana Qəzza zolağında həddindən artıq soyuq səbəbilə həyatını itirən uşaqların sayı 8-ə çatıb.

Yerli və tibbi mənbələr bildiriblər ki, bu ölümlər İsrailin atəşkəs rejiminə baxmayaraq Qəzzaya humanitar yardım girişlərini məhdudlaşdırması ilə birbaşa əlaqəlidir.

Qida, dərman, tibbi ləvazimatlar, yanacaq və sığınacaq avadanlıqlarının bölgəyə girişinin məhdud olması səbəbindən yüz minlərlə fələstinli primitiv və qeyri-kafi çadırlarda yaşamaq məcburiyyətində qalıb.

Mənbələr xüsusilə məcburi köçkün ailələrin soyuq hava şəraitinə qarşı qorunmasız ərazilərdə məskunlaşdığına diqqət çəkərək, mövcud vəziyyətin uşaqlar və körpələr üçün ciddi həyati risk yaratdığını vurğulayıblar.

Qəzza sakinlərinin sığınacaq və səhiyyə xidmətlərinə çıxışda ciddi çətinliklər yaşadığı, yanacağın bölgəyə buraxılmaması səbəbindən isinmə imkanlarının demək olar ki, tamamilə aradan qalxdığı qeyd edilib.

Bölgədə hökm sürən fırtınalı, yağışlı və soyuq hava şəraitinin, atəşkəs qüvvədə olsa da, dərinləşən humanitar böhranı daha da ağırlaşdırdığı bildirilib. Əsas ehtiyaclara çıxışın təmin olunmaması səbəbindən Qəzzada soyuq hava can almaqda davam edir.