BAKI, AzerVoice, Nailə Babazadə
ABŞ-ın müdafiə sənayesində yeni, lakin sürətlə inkişaf edən şirkətlərdən biri olan Anduril, ABŞ Donanmasının uçak gəmisi əsaslı pilotsuz döyüş təyyarəsi proqramı olan Carrier-Ready Collaborative Combat Aircraft (CCA) layihəsinə rəsmi şəkildə qoşulub.
AzerVoice xəbər verir ki, Anduril Boeing, Lockheed Martin, General Atomics və Northrop Grumman kimi nəhəng müdafiə şirkətləri ilə eyni sırada yer alaraq proqramın əsas iştirakçılarından birinə çevrilib.
Proqramın əsas məqsədi, pilotlu döyüş təyyarələri ilə yanaşı fəaliyyət göstərə bilən, aşağı maliyyətli və geniş miqyasda istehsal oluna bilən pilotsuz döyüş platformalarının hazırlanmasıdır. ABŞ Donanması bu təşəbbüslə daha çevik, modern və büdcəyə uyğun döyüş sistemlərini donanma tərkibinə sürətli şəkildə inteqrasiya etməyi hədəfləyir.
Anduril şirkəti yayımladığı rəsmi bəyanatda bildirib ki, ABŞ Donanması onları CCA proqramı üçün dizaynlar hazırlamaq üzrə seçib və şirkət sürətli və genişmiqyaslı istehsal imkanları ilə Donanmanın xüsusi tələblərinə cavab verə biləcək platformalar təqdim etməyə fokuslanıb. Bu açıqlama ilə Anduril, texnoloji çevikliyini və müdafiə sənayesində yüksələn rolunu bir daha vurğulayıb.
CCA proqramında rəqabət son dərəcə güclüdür. Lockheed Martin layihənin ortaq idarəetmə proqram təminatını hazırlayır, Northrop Grumman isə dəniz aviasiyası və süni intellekt sahəsindəki təcrübəsini tətbiq edir. General Atomics hal-hazırda YFQ-42A dizaynı üzərində işləyərək dəniz uyğunluğunu artırmağa çalışır. Boeing isə layihəyə uzun illərin sənaye təcrübəsi və istehsal gücü ilə qatılır.
Anduril-in bu sahədəki əsas üstünlüklərindən biri onun çevik və sürətli çatdırılma qabiliyyətidir. Şirkət daha əvvəl Ukraynaya qısa müddət ərzində müdafiə sistemləri göndərməsi və Tayvana yüksək texnologiyalı pilotsuz uçuş aparatları təmin etməsi ilə diqqət çəkmişdi. Hazırda Anduril-in inkişaf etdirdiyi YFQ-44A “Fury” adlı pilotsuz döyüş təyyarəsi ABŞ Hərbi Hava Qüvvələrinin CCA proqramında finalist seçilib və yaxın vaxtlarda ilk uçuşunu reallaşdıracağı gözlənilir.
Layihə çərçivəsində hər bir pilotsuz təyyarənin təxminən 15 milyon ABŞ dollarına başa gəlməsi planlaşdırılır. Bu isə Donanmaya daha çox sayda platformanı daha qısa müddətdə əldə etməyə imkan verəcək. İlkin əməliyyat sistemlərinin bu onilliyin ikinci yarısında – 2030-cu ilədək istifadəyə verilməsi nəzərdə tutulur. ABŞ Donanması hal-hazırda MQ-25 tanker dronu vasitəsilə uçak gəmisi əsaslı avtonom uçuş qabiliyyətlərini sınaqdan keçirməyə hazırlaşır.