BAKI, AzerVoice, Orxan Qədirzadə

Ukrayna Prezidenti Volodimir Zelenski Rusiyaya qarşı yeni əməliyyatların Ukrayna Təhlükəsizlik Xidməti xətti ilə razılaşdırıldığını açıqlayıb.

AzerVoice xəbər verir ki, Prezident bu barədə qurumun rəhbər vəzifəsini icra edən Yevgeni Xmara ilə görüşdən sonra məlumat verib.

Zelenskinin sözlərinə görə, Ukrayna Təhlükəsizlik Xidmətinin döyüş əməliyyatları ölkənin maraqlarına tam uyğun şəkildə həyata keçirilir. O bildirib ki, son dövrdə baş vermiş əməliyyatların detalları barədə ictimaiyyətə açıqlama vermək hələ tezdir, lakin gözlənilən nəticələr əldə olunub və yeni əməliyyatlar da razılaşdırılıb.

Prezident vurğulayıb ki, Ukrayna Təhlükəsizlik Xidməti ölkəyə qarşı diversiyaların bütün formalarına, eləcə də kollaborasiya hallarina qarşı mübarizəni davam etdirir. Onun sözlərinə görə, Ukrayna ərazisində Rusiya strukturlarının istənilən fəaliyyəti davamlı şəkildə bloklanır.

Bundan əvvəl Rusiya Federasiyasının Volqoqrad vilayətinin qubernatoru Andrey Boçarov pilotsuz uçuş aparatlarının hücumundan sonra bölgədə neft bazasında yanğın baş verdiyini bildirmişdi. Onun sözlərinə görə, hadisə Oktyabr rayonunda qeydə alınıb və yanğınsöndürmə briqadaları ilə operativ xidmətlər hadisə yerində işləyir.

İlkin məlumatlara əsasən, ölən və xəsarət alan yoxdur. Hakimiyyət orqanları yaxınlıqdakı yaşayış evlərinin sakinlərinin mümkün təxliyəsi üçün Oktyabr 2 nömrəli məktəbdə müvəqqəti yerləşdirmə məntəqəsini hazır vəziyyətə gətirib.

Rusiya Müdafiə Nazirliyi isə yanvarın 10-na keçən gecə hava hücumundan müdafiə qüvvələrinin on region üzərində, həmçinin anneksiya edilmiş Krım ərazisində Ukraynaya məxsus 59 pilotsuz uçuş aparatını vurduğunu açıqlayıb. Nazirlik hücumların konkret hansı obyektləri hədəf aldığına dair məlumat verməyib.