BAKI,AzerVoice, Fərid Mikayılov
ABŞ Prezidenti Donald Tramp ABŞ-ın aparıcı neft şirkətlərinin rəhbərləri ilə Venesueladakı enerji sektoru və investisiya imkanlarını müzakirə edib.
AzerVoice xəbər verir ki, Tramp bildirib ki, Amerika neft şirkətləri Venesuelada zəruri istehsal gücü və infrastrukturun qurulması üçün ən azı 100 milyard dollar sərmayə yatıracaq.
O vurğulayıb ki, şirkətlərin əsas ehtiyacı maliyyə deyil, təhlükəsizlik və dövlət təminatıdır.
Görüşdə Chevron, ExxonMobil, ConocoPhillips, Continental, Halliburton, Valero, Marathon, Shell, Trafigura, Vitol Americas, Repsol, Eni, Hilcorp və digər iri enerji şirkətlərinin rəhbərləri iştirak edib. Tədbirdə, həmçinin ABŞ-ın vitse-prezidenti Cey Di Vens, dövlət katibi Marko Rubio və enerji naziri Kris Rayt da yer alıb.
Tramp çıxışında bildirib ki, böyük Amerika şirkətləri Venesuelanın hazırda ağır vəziyyətdə olan neft sənayesinin sürətlə bərpasında əsas rol oynaya bilər. Onun sözlərinə görə, milyonlarla barel neft hasilatının bərpası ABŞ-a, Venesuela xalqına və qlobal enerji bazarına fayda verəcək.
ABŞ Prezidenti qeyd edib ki, Venesuela ötən cümə axşamı 4 milyard dollar dəyərində 30 milyon barel nefti ABŞ-a verib və hazırda bu neft ABŞ-a daşınır.
Tramp hansı neft şirkətlərinin Venesuelada fəaliyyət göstərə biləcəyinə ABŞ administrasiyasının qərar verəcəyini, şirkətlərlə ayrıca razılaşmalar imzalanacağını bildirib. O, ABŞ şirkətlərinə tam təhlükəsizlik zəmanəti veriləcəyini və onların Venesuela ilə deyil, birbaşa ABŞ hökuməti ilə işləyəcəyini vurğulayıb.
Trampın sözlərinə görə, Amerika şirkətləri Venesuelanın köhnəlmiş enerji infrastrukturunu yenidən qurmaq və neft hasilatını görünməmiş səviyyəyə çatdırmaq imkanı əldə edəcək.
“ABŞ və Venesuelanı bir araya gətirdikdə, dünyadakı neft ehtiyatlarının təxminən 55 faizinə nəzarət etmiş oluruq” – deyə Tramp bildirib.
ABŞ Prezidenti qeyd edib ki, əgər ABŞ bu prosesi həyata keçirməsəydi, bunu Çin və ya Rusiya edəcəkdi. Onun sözlərinə görə, Vaşinqton bu ölkələrə Venesuelada enerji sektorunda yer almamalarını açıq şəkildə bildirib.
Tramp əlavə edib ki, Çin və Rusiya istədikləri halda ABŞ-dan neft ala bilərlər, lakin Venesueladakı proses ABŞ-ın nəzarəti altında olacaq.nMobil rəhbərliyinin işlərə bir neçə həftə ərzində başlamağa hazır olduqlarını bildirməsinə cavab olaraq isə Tramp, “Biz sürət və keyfiyyət istəyirik,” deyə vurğulayıb.