BAKI, AzerVoice, Orxan Qədirzadə

İsrailin baş naziri Benyamin Netanyahunun keçmiş köməkçisi və mətbuat katibi Eli Feldşteyn 2023-cü ilin 7 oktyabrında HƏMAS-ın İsrailə hücumundan dərhal sonra baş nazirin ondan təhlükəsizlik boşluğu ilə bağlı məsuliyyətdən yayınmaq üçün plan hazırlamağı tələb etdiyini iddia edib.

AzerVoice-un məlumatına görə, hazırda məxfi məlumatları mətbuata ötürməkdə ittiham olunan Feldşteyn bu açıqlamaları İsrailin “Kan” televiziya kanalına verdiyi geniş müsahibədə səsləndirib.

Onun sözlərinə görə, hücumdan sonra Netanyahudan aldığı “ilk tapşırıq” ictimaiyyət və mediada məsuliyyət məsələsinin gündəmdən çıxarılması olub. Feldşteyn bildirib ki, baş nazir mediada məsuliyyət mövzusunun müzakirə edilib-edilmədiyi ilə maraqlanıb və bu mövzuda yaranmış təzyiqin necə neytrallaşdırıla biləcəyi barədə təkliflər istəyib.

Keçmiş köməkçi əlavə edib ki, Netanyahu bu söhbət zamanı gərgin və təşvişli görünürdü. Feldşteynin sözlərinə görə, sonradan baş nazirin yaxın çevrəsindən ona rəsmi açıqlamalarda “məsuliyyət” sözündən istifadə etməmək tapşırılıb.

Xatırladaq ki, 7 oktyabr 2023-cü ildə HƏMAS-ın rəhbərlik etdiyi silahlı qruplar İsrailin cənubuna hücum edərək təxminən 1200 nəfəri öldürmüş, 251 nəfəri isə girov götürmüşdü. Bundan sonra İsrail Qəzza zolağında genişmiqyaslı hərbi əməliyyatlara başlayıb. Qəzza Səhiyyə Nazirliyinin məlumatına əsasən, müharibə nəticəsində Qəzzada təxminən 71 min nəfər həlak olub.

Netanyahunun ofisi isə Feldşteynin iddialarını rədd edərək, açıqlamaları şəxsi maraqlara əsaslanan və məsuliyyəti öz üzərindən yayındırmağa yönəlmiş əsassız ittihamlar kimi qiymətləndirib.

Qeyd edək ki, Feldşteyn ötən il Qəzzada altı girovun öldürülməsindən sonra baş nazirin imicini yaxşılaşdırmaq məqsədilə məxfi hərbi məlumatları Almaniya mətbuatına sızdırmaqda ittiham olunub və bu iş üzrə məhkəmə qarşısına çıxarılacaq.