BAKI, AzerVoice, Nailə Babazadə

İsrail ordusu atəşkəsə rəğmən Qəzza zolağının müxtəlif bölgələrinə istiqamətlənmiş hücumlarını davam etdirərkən, Xan Yunisdə ayaqda qalan binaları da partlayıcılarla havaya uçurub.

AzerVoice xəbər verir ki, İsrail 10 oktyabrdan bəri qüvvədə olan atəşkəs razılaşmasını pozmağa davam edir.

Şahidlərin sözlərinə görə, İsrail ordusu Qəzza şəhərinin şərq bölgələrini və bölgənin şimalında yerləşən Cibaliya qəsəbəsinin şərq hissəsini hədəf alıb.

Məlumata görə, İsrail ordusu Xan Yunis şəhərinin şərqindəki bina və evləri partlayıcılarla məhv edib. Hücumlar nəticəsində baş verən güclü partlayış səsləri Qəzza zolağının bir çox bölgəsindən eşidilib.

Həmçinin İsrail Hərbi Dəniz Qüvvələrinə məxsus döyüş gəmilərinin Rəfah və Xan Yunis şəhərlərinin sahillərinə atəş açdığı, eyni zamanda Rəfah üzərində İsrailə məxsus helikopterdən atəş açıldığı bildirilib.

Qəzzadakı Səhiyyə Nazirliyinin məlumatına görə, atəşkəs razılaşmasının qüvvəyə minməsindən bu yana İsrail ordusunun hücumları nəticəsində 574 fələstinli həyatını itirib, 1518 nəfər isə yaralanıb.