BAKI, AzerVoice, Nailə Babazadə
İsrail təxminən iki illik fasilədən sonra Misir sərhədində yerləşən Rəfah sərhəd keçid məntəqəsindən cəmi 12 fələstinlinin Qəzza zolağına qayıtmasına icazə verib.
AzerVoice xəbər verir ki, 2024-cü ilin may ayından bəri ilk dəfə məhdud və ciddi nəzarət altında ikitərəfli keçid üçün açılan məntəqədən 9 qadın və 3 uşaq olmaqla 12 fələstinli keçib. Onlar Birləşmiş Millətlər Təşkilatına (BMT) məxsus avtomobillərin müşayiəti ilə Qəzza zolağının cənubundakı Xan Yunis şəhərində yerləşən Nasir xəstəxanasına çatdırılıblar.
Nasir xəstəxanasının qarşısında yaxınlarını qarşılayan onlarla fələstinli aylardır görmədikləri ailə üzvlərini coşqu və göz yaşları ilə qarşılayıblar. Qəzzaya qayıdan şəxslər Misirdəki xəstəxanalarda müalicə alan xəstələr və onları müşayiət edən şəxslərdir. Lakin geri dönənlərin bəziləri sərhəddə İsrail hərbçilərinin pis rəftarına məruz qaldıqlarını, şəxsi əşyalarının və uşaqların oyuncaqlarının əllərindən alındığını bildiriblər.
İsrail və Misir mətbuatında yer alan məlumatlara görə, əslində 50 fələstinlinin Qəzzaya keçməsi gözlənilirdi, lakin yalnız 12 nəfər bölgəyə çata bilib. İsrail mətbuatı gündə 150 nəfərin Qəzzadan çıxışına, 50 nəfərin isə geri qayıtmasına icazə veriləcəyini yazsa da, tərəflər arasında sayla bağlı anlaşmazlıqlar davam edir. İsrail çıxanların sayının geri qayıdanlardan çox olmasını tələb edərkən, Misir bunun fələstinlilərin bölgədən zorla köçürülməsinə gətirib çıxaracağından narahatdır.
Rəfah sərhəd keçid məntəqəsinin infrastrukturu İsrailin hücumları nəticəsində ciddi zərər görüb və məntəqə təxminən 21 aydır tamamilə bağlı idi. Hazırda keçidlərə yalnız İsrailin xüsusi təsdiqindən sonra icazə verilir.
Sərhədin məhdud açılmasına baxmayaraq, İsrail atəşkəs planının əsas hissəsi olan humanitar yardımların və ağır texnikaların bölgəyə girişini hələ də əngəlləyir. Fələstin Səhiyyə Nazirliyi və beynəlxalq təşkilatların məlumatına görə, Qəzzada 4 mindən çoxu uşaq olmaqla, 16 min 500-dən çox yaralı və xəstə təcili olaraq xaricdə müalicə olunmaq üçün növbə gözləyir. Tibbi imkanların yetərsizliyi səbəbindən indiyədək 1000-dən çox fələstinlinin həyatını itirdiyi bildirilir.