BAKI,AzerVoice, Fərid Mikayılov

İordaniya Kralı II Abdullah Prezident Rəcəb Tayyib Ərdoğanın dəvəti ilə Türkiyəyə rəsmi səfər həyata keçirir.

AzerVoice xəbər verir ki, Türkiyə Prezidenti İordaniya Kralı II Abdullahı Prezidentliyin Dolmabahçə Ofisində rəsmi mərasimlə qarşılayıb.

Rəsmi qarşılama mərasimindən sonra Prezident Ərdoğan və Kral II Abdullah arasında nümayəndə heyətlərinin iştirakı ilə görüş keçirilib.

Görüşdə Türkiyənin milli müdafiə naziri Yaşar Gülər, xarici işlər naziri Hakan Fidan, MİT rəhbəri İbrahim Kalın, həmçinin Prezidentin xarici siyasət və təhlükəsizlik məsələləri üzrə baş müşaviri Akif Çağatay Kılıç iştirak ediblər.

Səfər çərçivəsində Ərdoğanın İordaniya Kralı tərəfindən təqdim olunacaq Hüseyn bin Əli Ordeninin təqdimetmə mərasiminə və rəsmi ziyafətə də qatılacağı bildirilib.

Türkiyə Prezident Administrasiyasının Kommunikasiya İdarəsinin rəhbəri Burhanəddin Duran İordaniya Kralının səfəri ilə bağlı sosial media hesabında paylaşım edib. Duran qeyd edib ki, keçirilən görüşlərdə ikitərəfli münasibətlərlə yanaşı, regiondakı aktual proseslər və sabitliyin təmin olunması istiqamətində atıla biləcək addımlar müzakirə olunacaq.