BAKI, AzerVoice

“HƏMAS” hərəkatı başda olmaqla səkkiz fələstinli fraksiya bu həftə Qahirədə keçiriləcək görüşdə Qəzza zolağında keçid idarəçiliyi modelinə dair razılıq əldə etməyə çalışacaq.

Məlumata əsasən, tərəflər Qəzzəni idarə edəcək təklif olunan texnokratlar komitəsinə kimin rəhbərlik edəcəyi və bu hökumətin Fələstin Muxtariyyəti çərçivəsində fəaliyyət göstərib-göstərməyəcəyi barədə müzakirələr aparacaq.

Ərəb və fələstinli rəsmilərin sözlərinə görə, əgər belə bir idarə heyəti formalaşarsa, o, ABŞ Prezidenti Donald Trampın planında nəzərdə tutulan “Sülh Şurası”nın funksiyalarını əvəz edə və ya onunla paralel fəaliyyət göstərə bilər. Yeni qurumun məqsədi Qəzzə daxilində təhlükəsizliyi təmin etmək olacaq - bunun üçün xarici qüvvələrin yerləşdirilməsi variantı da müzakirə olunur.

Mənbələr bildiriblər ki, stabilizasiyanı qorumaq məqsədilə çoxmillətli qüvvələrin formalaşdırılması ilə bağlı ayrıca danışıqlar da davam edir.

Misirin xarici işlər naziri Bədr Əbdülati The Washington Post-a açıqlamasında bildirib ki, məqsəd tamamilə Qəzzadan olan texnokratlardan ibarət inzibati komitə yaratmaqdır.

“Əsas məqsəd fələstinlilərin, o cümlədən Fələstin Muxtariyyətinin, Qəzzəni İordan çayının qərb sahilinin ayrılmaz hissəsi kimi idarə etməsini təmin etmək və bu addımı gələcək Fələstin dövlətinin qurulmasına doğru atmaqdır,” - deyə nazir vurğulayıb.

Əbdülati qeyd edib ki, komitə Qəzzədə gündəlik həyatın idarə olunmasına, polis qüvvələri isə qanunların icrasına və təhlükəsizliyin təmininə cavabdeh olacaq.

Nazir əlavə edib ki, “Sülh Şurası”nın mandatını BMT Təhlükəsizlik Şurası müəyyən etməlidir, o cümlədən onun fələstinli inzibati komitə ilə əlaqəsini. Bununla belə, o vurğulayıb ki, Misir və fələstinli fraksiyalar arasında Qəzzənin vətəndaş işlərinin yalnız fələstinlilər tərəfindən idarə edilməli olduğu barədə tam razılıq mövcuddur.