BAKI, AzerVoice, Nailə Babazadə

İndoneziya Qəzza zolağı kimi münaqişə zonalarında yerləşdirilmək üçün 5 min ilə 8 min arasında şəxsi heyətin hazırlanmasına başladığını rəsmən elan edib.

AzerVoice xəbər verir ki, İndoneziya Milli Silahlı Qüvvələrinin (TNI) komandanı general Maruli Simancuntak bildirib ki, hərbçilərin hazırlıq prosesi artıq start götürüb. Komandanın sözlərinə görə, göndəriləcək əsgərlərin dəqiq sayı və missiyaya başlayacağı tarix hələlik tam dəqiqləşməsə də, hazırlıqlar briqada səviyyəsində (təxminən 5-8 min nəfər) davam etdirilir.

Bu strateji addım ABŞ prezidenti Donald Trampın Qəzza sülh planı çərçivəsində təhlükəsizliyi təmin etmək məqsədilə yaradılan Beynəlxalq sabitləşdirici qüvvələrin (ISF) formalaşdırılması prosesinin tərkib hissəsidir. Qəzzada yerləşdiriləcək bu beynəlxalq koalisiyaya ABŞ-ın təcrübəli hərbi xadimi, general-mayor Jasper Jeffersin komandanlıq edəcəyi artıq rəsmən açıqlanıb. İndoneziyanın ISF çərçivəsində bölgəyə qoşun yerləşdirən ilk ölkələrdən biri olacağı gözlənilir.

İlkin iddialara görə, İndoneziya sülhməramlıları Qəzzanın cənubunda yerləşən Rəfah və Xan Yunis şəhərləri arasındakı strateji əhəmiyyətli ərazidə yerləşdiriləcək. Bu qüvvələrin əsas vəzifəsi bölgədə asayişi qorumaq, humanitar yardımların paylanmasına nəzarət etmək və sülh prosesinin dayanıqlığını təmin etmək olacaq. Hazırda bu planın detalları və şəxsi heyətin sayı ilə bağlı beynəlxalq səviyyədə müzakirələr davam edir.