BAKI,AzerVoice

Misirin Qahirə Universitetinin Ədəbiyyat fakültəsinin Şərq dilləri bölməsində Azərbaycan dilinin tədrisi yeni semestrdə də davam etdirilir.

AzerVoice xəbər verir ki, ana dilimiz 10 ildir bu təhsil ocağında tədris olunur.

Azərbaycan dilini tələbələrə Misirdə Azərbaycan diasporu və Misir-Azərbaycan Dostluq Cəmiyyətinin İdarə Heyətinin sədri tədqiqatçı-alim Seymur Nəsirov tədris edir. Həmçinin gənclərə ölkəmizin zəngin mədəniyyəti, xalqımızın adət-ənənələri, ölkələrimiz arasında müxtəlif sahələrdə əlaqələrin inkişafı və Azərbaycan həqiqətləri ilə bağlı geniş məlumat verilir.

S.Nəsirov dilimizi öyrənməyə böyük maraq göstərən gənclər üçün yaxın günlərdə Qahirədəki diaspor mərkəzində əlavə kursların təşkil ediləcəyini bildirib. O əlavə edib ki, indiyədək 1700 çox tələbəyə Azərbaycan dili öyrədilib. Onların arasında Azərbaycan dili və ədəbiyyatı üzrə təhsilini magistraturada davam etdirənlər də var.

Qeyd edək ki, diaspor mərkəzində Misirin müxtəlif universitetlərində təhsil alan tələbələr Azərbaycan dili dərslərində iştirak edirlər. Onların arasında məqalələri Azərbaycan dilindən ərəb dilinə tərcümə etmək səviyyəsində olanlar da var. Eyni zamanda, hazırda diaspor mərkəzində dünyanın 59 ölkəsindən 650-dən çox tələbə Azərbaycan dili də daxil olmaqla, müxtəlif fənlər üzrə ödənişsiz təhsil alır.