BAKI, AzerVoice, Nailə Babazadə

Ağ Ev rəsmisi bazar ertəsi günü ABŞ Prezidenti Donald Trampın İsrailin İordan çayının qərb sahilini ilhaq etməsinə qarşı olduğunu bir daha təsdiqləyib.

AzerVoice xəbər verir ki, ABŞ rəsmisi bildirib ki, “İordan çayının qərb sahilindəki sabitlik İsrailin təhlükəsizliyini qoruyur və administrasiyanın regionda sülhə nail olmaq məqsədinə uyğundur”.

Öz növbəsində, BMT-nin Baş katibi Antonio Quterreş bazar ertəsi günü İsrail Nazirlər Kabinetinin işğal altındakı İordan çayının qərb sahilinin "A" və "B" zonalarında bir sıra inzibati və icraedici tədbirlərə icazə verilməsi barədə qərarından ciddi narahatlığını ifadə edib. O xəbərdarlıq edib ki, bu qərar iki dövlətli həll variantı perspektivini sarsıdır.

Baş katib verdiyi bəyanatda qeyd edib ki, bu cür tədbirlər, o cümlədən İsrailin işğal olunmuş Fələstin torpaqlarında mövcudluğunun davam etməsi nəinki sabitliyi pozur, həm də Beynəlxalq Ədalət Məhkəməsinin rəyinə görə qeyri-qanunidir. Quterreş İsrailə həmin tədbirlərdən daşınmağa çağırıb, həmçinin bütün tərəfləri Təhlükəsizlik Şurasının qətnamələrinə və beynəlxalq hüquqa uyğun olaraq davamlı sülhə nail olmağın yeganə yolu olan iki dövlətli həll variantını qorumağa səsləyib.

İsrailin "Ynet" xəbər saytı bazar günü bildirib ki, İsrail Nazirlər Kabineti İordan çayının qərb sahilində torpaqların qeydiyyatı və sahibliyi prosedurlarında köklü dəyişiklikləri təsdiqləyib ki, bu da fələstinlilərə məxsus evlərin sökülməsinə imkan verir. Sayt təsdiqləyib ki, yeni qərarlar İsrailə işğal altındakı İordan çayının qərb sahilinin "A" zonasında fələstinlilərə məxsus binaları sökmək imkanı verəcək, həmçinin İordan çayının qərb sahilinin bütün ərazilərində məskunlaşma əməliyyatlarının böyük ölçüdə genişlənməsinə səbəb olacaq.

Ərəb və İslam ölkələrinin xarici işlər nazirləri İsrailin İordan çayının qərb sahilində yeni hüquqi və inzibati reallıq yaratmaq və ilhaq cəhdlərini sürətləndirmək məqsədi daşıyan son qərarlarını və tədbirlərini pisləyiblər. Səudiyyə Ərəbistanı, İordaniya, BƏƏ, Qətər, İndoneziya, Pakistan, Misir və Türkiyə xarici işlər nazirləri Səudiyyə Ərəbistanı XİN tərəfindən yayılan bəyanatda vurğulayıblar ki, işğal olunmuş Fələstin torpaqlarında İsrailin heç bir suverenliyi yoxdur. Onlar İsrailin işğal altındakı İordan çayının qərb sahilində həyata keçirdiyi ekspansionist siyasət və qeyri-qanuni tədbirlərin davam etdirilməsi barədə xəbərdarlıq ediblər.

Əmmanda İordaniya Kralı II Abdulla və Fələstin Prezidenti Mahmud Abbas "yaşayış məntəqələrini möhkəmləndirmək və İordan çayının qərb sahili üzərində İsrail suverenliyini tətbiq etmək məqsədi daşıyan" qeyri-qanuni hərəkətləri rədd etdiklərini və pislədiklərini təsdiqləyiblər.

Ramallahda isə Fələstin Rəyasət Heyəti İsrail hökumətinin İordan çayının qərb sahili ilə bağlı qərarlarını "təhlükəli və Fələstin varlığını hədəf alan" addım kimi qiymətləndirib. Fələstin rəsmi xəbər agentliyi (WAFA) Rəyasət Heyətinin bu qərarları "Fələstin xalqına qarşı aparılan hərtərəfli müharibənin tərkib hissəsi, ilhaq və deportasiya planlarının icrası" kimi xarakterizə etdiyini bildirib.