BAKI, AzerVoice

Pişiklər sahiblərinin qoxusunu yad adamlardan ayıra bilirlər.

AzerVoice xəbər verir ki, Yaponiyada aparılan tədqiqat ev pişiklərinin tanış və yad insanların qoxularını fərqləndirə bildiyini ortaya qoyub.

Tokio Kənd Təsərrüfatı Universitetində keçirilən bu araşdırma pişiklərin insanlarla əlaqəsində qoxu duyğusunun rolunu bir daha gündəmə gətirib.

Tədqiqat çərçivəsində 30 ev pişiyinə üç müxtəlif boruda qoxu nümunələri təqdim olunub: birinci boruda sahibinin bədənindən götürülmüş qoxular, ikinci boruda tanımadıqları insanın qoxusu, üçüncü isə neytral – yəni qoxusuz nümunə idi.

Nəticələrə görə, pişiklər yad insanların qoxusunu daha uzun müddət iyləyib. Alimlər bu reaksiyanı onların qoxu vasitəsilə tanış və yad insanları ayırd edə bilməsi ilə izah edirlər. Lakin pişiklərin sahiblərini digər tanış insanlardan fərqləndirib- fərqləndirə bilmədiyi sual olaraq qalır.

“Nəticələr maraqlıdır, lakin pişiklərin insanları konkret olaraq fərd kimi tanıyıb-tanımadığını demək üçün daha geniş miqyaslı təcrübələrə ehtiyac var. Məsələn, bir neçə tanış insana aid qoxularla aparılacaq testlər daha dəqiq nəticə verə bilər” - deyə Tədqiqatın müəllifi Hidehiko Uchiyama bildirib.

Araşdırma zamanı pişiklərin borulara üzlərini sürtməsi də müşahidə olunub. Bu davranış onların ərazi işarələmə refleksləri ilə əlaqələndirilib və iyləmənin bu prosesin ilkin mərhələsi ola biləcəyi ehtimal edilir.

İtaliyanın Bari Universitetindən pişik davranışları üzrə mütəxəssis Serenella d'Ingeo da bu nəticələri şərh edərək “Pişiklər bu qoxulara cavab verərkən emosional cəhətdən necə hiss edirdilər – sakit, yoxsa narahat idilər – bunu bilmədiyimiz üçün nəticələri genişləndirmək doğru olmaz” - deyə qeyd edib.

Qeyd edək ki, pişiklərin qoxu duyğusu onlara digər pişiklərlə əlaqə yaratmaqda əsas vasitədir. Bu yeni tədqiqat onların insanları da qoxular vasitəsilə tanıya bildiyini göstərsə də, sahiblərini xüsusi olaraq tanıyıb-tanımadıqları hələlik tam aydın deyil.