BAKI, AzerVoice, Orxan Qədirzadə

Pakistanın şimal-qərbində yerləşən Tank bölgəsində polisə məxsus zirehli avtomobilin partladılması nəticəsində azı yeddi polis əməkdaşı həlak olub. Hadisə bazar ertəsi günü baş verib.

AzerVoice xəbər verir ki, yerli polis orqanlarının məlumatına görə, avtomobil yol kənarında uzaqdan idarə olunan bomba ilə hədəfə alınıb. Hücumdan sonra zirehli maşın aşaraq yolun kənarına düşüb.

Tank rayon polisinin rəhbər müavini Pərviz Şah bildirib ki, partlayış nəticəsində beş polis əməkdaşı hadisə yerində həyatını itirib, daha iki nəfər isə xəstəxanada dünyasını dəyişib.

Pakistanın daxili işlər naziri Möhsin Nəqvi yaydığı açıqlamada həlak olan polis əməkdaşlarını “millətin təhlükəsiz gələcəyi naminə canından keçən qəhrəmanlar” adlandırıb.

Hazırda hücuma görə məsuliyyəti üzərinə götürən hər hansı qrup açıqlama verməyib.

Tank bölgəsinin yerləşdiyi Xeybər-Paxtunxva əyaləti son dövrlərdə silahlı radikal qrupların hücumlarının artması ilə üzləşir. Pakistan hakimiyyəti bu hücumların əsasən “Pakistan Talibanı” kimi tanınan silahlı qrupla əlaqəli olduğunu bildirir.

İslamabad rəsmi olaraq Əfqanıstandakı Taliban hakimiyyətini Pakistan Talibanı döyüşçülərinə sığınacaq verməkdə ittiham edir. Rəsmi Kabil isə bu iddiaları rədd edərək Pakistanın təhlükəsizlik problemlərinin daxili məsələ olduğunu vurğulayır.

Xatırladaq ki, Pakistan və Əfqanıstan arasında ötən ilin oktyabrında baş verən sərhəd toqquşmalarından sonra əldə olunmuş kövrək atəşkəs qüvvədədir. Həmin toqquşmalar 2021-ci ildə Əfqanıstanda Talibanın hakimiyyətə gəlişindən sonra iki ölkə arasında qeydə alınmış ən ağır silahlı qarşıdurma kimi qiymətləndirilmişdi.