BAKI, AzerVoice
Neft İxrac Edən Ölkələr Təşkilatı (OPEC) və təşkilata daxil olmayan bəzi neft istehsalçısı ölkələrdən ibarət "OPEC plus" qrupu üzvü olan 8 ölkə, iyul ayında əvvəlki aya nisbətən gündəlik 411 min barel istehsal artımına getmək qərarına gəlib.
AzerVoice xəbər verir ki, bu barədə OPEC tərəfindən verilən açıqlamada deyilir.
Açıqlamada Səudiyyə Ərəbistanı, Rusiya, İraq, Birləşmiş Ərəb Əmirlikləri, Küveyt, Qazaxıstan, Əlcəzair və Oman daxil olmaqla "OPEC plus" ölkələrinin bazar şərtlərini qiymətləndirmək üçün onlayn iclas keçirdikləri bildirilib.
Qlobal iqtisadi mənzərənin sabitliyi və aşağı neft ehtiyatlarının sağlam bazar təməllərinə işarə etməsi fonunda bu istehsal artımının ötən il dekabrın 5-də qəbul edilən qərara əsaslandığı vurğulanıb.
Buna əsasən, adıçəkilən ölkələr aprelin 1-dən tətbiq etdikləri gündəlik 2,2 milyon barellik könüllü kəsinti prosesini mərhələli və çevik şəkildə bitirmə mərhələsinin bir hissəsi olaraq iyul ayında əvvəlki aya nisbətən gündəlik 411 min barel istehsal artımı edəcəklər.
Açıqlamada, gündəlik 411 min barellik artımın üç aylıq mərhələli artımın cəmi olduğuna diqqət çəkilərək, bazar şərtlərinə görə bu artımın dayandırıla biləcəyi və ya əks istiqamətə dəyişdirilə biləcəyi qeyd olunub.
Qrupun avqust ayı istehsal səviyyəsini müəyyənləşdirəcək növbəti iclasının isə 6 iyul tarixində keçiriləcəyi bildirilib.
