BAKI, AzerVoice, Səməd Əyyubov

İtaliyadan Qəzza zolağına humanitar yardım göndərmək məqsədilə yola çıxan və İsrail donanması tərəfindən saxlanılaraq Aşdod limanına gətirilən Hanzala gəmisindəki bütün fəallar azadlığa buraxılıb.

AzerVoice xəbər verir ki, bu barədə Azadlıq Donanması Koalisiyası məlumat verib.

Məlumata görə, saxlanılan son iki şəxs — amerikalı Kristian Smols və tunisli Hatem Auini 5 günlük həbsdən sonra azadlığa buraxılıb. Hər iki fəalın etiraz etmək üçün aclıq aksiyası keçirdiyi bildirilib.

Tunisli fəal Auini sərhəddə ölkəsinin səfirliyi tərəfindən qarşılanıb. Lakin Smols ABŞ səfirliyi və konsulluğunun öncədən məlumatlandırılmasına baxmayaraq, qarşılanmayıb.

Həmçinin vurğulanıb ki, İsrail həbsxanalarında 320-si uşaq olmaqla 10 300-dən çox fələstinli siyasi məhbus beynəlxalq hüquq normalarının pozuntusuna, dəhşətli işgəncələrə və zorakılıqlara məruz qalaraq saxlanılır. Koalisiya Qəzza blokadasını dəf etmək missiyasının davam etdiyini bildirib.

Xatırladaq ki, Hanzala gəmisi iyulun 20-də İtaliyanın cənubundan Qəzzaya doğru yola çıxmış, 26 iyul gecəsi İsrail ordusu tərəfindən müdaxilə edilərək Aşdod limanına çəkilmişdi. Gəmidə iki jurnalist və iki Avropa parlament üzvünün də daxil olduğu 21 nəfər İsrail tərəfindən saxlanılmışdı.

Qeyd edək ki, “Hanzala” əvvəllər balıqçı gəmisi olub və sonradan humanitar məqsədlər üçün yenidən qurulub. Gəmi ilk səfərində Sirakuza limanında böyük maraqla qarşılanmış, ikinci səfəri isə 20 iyul tarixində həyata keçirilib.