BAKI, AzerVoice, Səməd Əyyubov
İsrail Hərbi Hava Qüvvələrinə məxsus qırıcı təyyarələr Livanın şərq və cənub bölgələrinə bir neçə hava zərbəsi endirib.
AzerVoice-un məlumatına görə, zərbələr ölkənin Bəqaa bölgəsində yerləşən Birital qəsəbəsinin təpəlik ərazilərini, Ayşiyyə, Nasiriyyə, Əl-Hüreybə, Zəhle qəsəbələri ilə Şəra bölgəsini, Əl-Cərmak qəsəbəsinin ətrafını, ölkənin cənubundakı Əl-Mahmudiyyə və Əl-Xardəli bölgələrinə endirilib.
Hazırda insan tələfatı və dağıntılar barədə məlumat verilməyib.
Qeyd edək ki, ötən il noyabrın 27-də qüvvəyə minən atəşkəsə baxmayaraq, İsrail ordusu Livanın cənubuna demək olar ki, hər gün hücumlar həyata keçirir. Bu müddət ərzində İsrail ordusu təxminən 3 min dəfə atəşkəsi pozub, nəticədə azı 213 nəfər həlak olub, 508 nəfər yaralanıb.
İsrail ordusu Livanın cənubundan qismən geri çəkilsə də, son toqquşmalarda ələ keçirdiyi 5 strateji nöqtə üzərində nəzarətini davam etdirir.