BAKI, AzerVoice Analitik Təhlil Mərkəzi
İsrail rəsmiləri, “HƏMAS”ın yalnız dörd nəfərin cəsədini təhvil verməsindən sonra “dərin şok və məyusluq” ifadə ediblər. Bu, İsrailin gözlədiyindən xeyli azdır və Təl-Əviv bu addımı razılaşmanın pozulması kimi qiymətləndirib.
İsrail Müdafiə Nazirliyindən bildirilib ki, əgər “HƏMAS” qalan cəsədlərin təhvil verilməsində tam əməkdaşlıq göstərməsə, bu, gələcək danışıqlarda təzyiq vasitəsi yaratmaq məqsədi daşıyan addım kimi dəyərləndiriləcək.
Dörd cəsəd Təl-Əvivə gətirilib
İsrailin “Ynet” portalının məlumatına görə, dörd cəsəd bazar ertəsi axşamı Təl-Əvivdəki Milli Tibbi Ekspertiza Mərkəzinə gətirilib. Onların şəxsiyyəti rəsmi olaraq hələ müəyyənləşdirilməyib. “HƏMAS” isə bəyan edib ki, cəsədlər Daniel Peretz, Bipin Joshi, Guy Eluz və Yossi Sharabiyə məxsusdur - onlar 2023-cü il 7 oktyabr hücumları zamanı girov götürülən şəxslər arasında olublar.
İsrail rəsmiləri “HƏMAS”ın “digər cəsədlərin harada olduğunu bilmədikləri” iddiasına inanmadıqlarını bildiriblər. Onlar qeyd ediblər ki, bu, Şarm əl-Şeyxdəki danışıqlar zamanı verilən bəyanatlarla ziddiyyət təşkil edir, çünki o vaxt “HƏMAS” daha çox sayda cəsədin yerini bildiyini etiraf etmişdi.
Razılaşmanın pozulması və mümkün sanksiyalar
Mövcud razılaşmaya əsasən, “HƏMAS” bütün əsirləri - sağ və ya ölü – bazar ertəsi saat 12:00-a qədər təhvil verməli idi. Bu müddət İsrail qüvvələrinin Qəzzənin “sarı xətt” adlanan bölgəsinə geri çəkilməsindən sonra başlayan 72 saatlıq atəşkəsin sonuna təsadüf edirdi.
Lakin “HƏMAS”ın yalnız dörd cəsədi qaytarması Təl-Əvivdə kəskin qəzəb doğurub. Müdafiə Nazirliyi xəbərdarlıq edib ki, “HƏMAS” tam əməkdaşlıq göstərməsə, cəza tədbirləri tətbiq ediləcək. Bu tədbirlər çörək bişirmə materiallarının, mobil evlərin və əsas ərzaq məhsullarının Qəzzəyə girişinin məhdudlaşdırılmasını əhatə edə bilər.
Eyni zamanda İsrail vasitəçilərə sərt xəbərdarlıqlar göndərib, onları “HƏMAS”a təzyiq göstərərək daha çox cəsədin təhvil verilməsini təmin etməyə çağırıb.
“Tarixi gün” ümidləri puç oldu
İsrail hökumət mənbələri bildiriblər ki, bu hadisə “əsir məsələsində tarixi dönüş nöqtəsi” kimi qiymətləndirilən günün üzərinə kölgə salıb.
ABŞ Prezidenti Donald Trampın müharibənin başa çatdığını elan etdiyi bir vaxtda, İsraildə dərin məyusluq və qəzəb dalğası yaranıb. Rəsmilər hesab edirlər ki, “HƏMAS” cəsədləri saxlayaraq gələcək danışıqlarda üstünlük qazanmaq istəyir.
Girov ailələri birlikdə yayımladıqları bəyanatda hadisəni “rahatlıqla qəbul edilə bilməyəcək açıq pozuntu” adlandırıblar.
“Bu, HƏMAS tərəfindən razılaşmanın açıq şəkildə pozulmasıdır. Bütün cəsədlər geri qaytarılmadan heç bir mərhələnin davam etdirilməsini qəbul etmirik.”-deyə əsir ailələri komitələri bəyanat yayıblar.
Ailələr İsrail hökumətinə və vasitəçi ölkələrə çağırış ediblər.
“Əgər HƏMAS öhdəliklərini yerinə yetirmirsə, İsrail də öz öhdəliklərini yerinə yetirməməlidir. Biz 28 girov və cəsədin hamısının geri qaytarılmasını tələb edirik. Heç kəs unudulmayacaq - sonuncu əsir vətənə dönənə qədər.”-deyə çağırışda deyilir.