BAKI,AzerVoice, Fərid Mikayılov

İsrail ordusu ABŞ-nin İrana mümkün hərbi zərbəsi ehtimalı fonunda regionda yarana biləcək risklərə qarşı bütün istiqamətlər üzrə hazırlıq tədbirlərini gücləndirib.

AzerVoice xəbər verir ki, bu barədə İsrail ordusunun Şimal Cəbhəsi Komandanı, general-mayor Rafi Milo açıqlama verib.

Onun sözlərinə görə, Vaşinqtonun Tehrana mümkün hücumu İranın cavab addımlarına səbəb ola bilər və bu cavabın İsrail üzərindən reallaşması ehtimalı istisna edilmir.

Milo qeyd edib ki, vəziyyətin hansı istiqamətdə inkişaf edəcəyini proqnozlaşdırmaq çətindir, bu səbəbdən İsrail ordusu həm müdafiə, həm də hücum imkanlarını yüksək səviyyədə hazır saxlayır. O, Hizbullahın daha geniş miqyaslı qarşıdurmaya qoşulub-qoşulmayacağının da yaxından izlənildiyini vurğulayıb.

İsrailli general çıxışında Türkiyə və Qətərin regional balans baxımından “problematik amillər” olduğunu iddia edib, Suriyadakı vəziyyəti isə “mürəkkəb və çətin” kimi xarakterizə edib. Onun sözlərinə görə, İsrail ordusu Suriyanın cənubunda nəzarət etdiyi ərazilərdə hərbi əməliyyatları davam etdirəcək.

Bu arada İsrail Ordu Sözcüsü Effie Defrin ABŞ mərkəzli sosial media platformasında yaydığı açıqlamada bildirib ki, ABŞ-nin İrana mümkün hücumu ehtimalı nəzərə alınaraq, İsrail ordusu həftə ərzində bütün sahələr üzrə hazırlıq səviyyəsinin yüksəldilməsinə fokuslanıb.