BAKI, AzerVoice, Nailə Babazadə
BMT-nin fələstinli qaçqınlar üzrə agentliyi bazar günü bildirib ki, Şərqi Qüdsdəki qismən sökülmüş qərargahı yandırılıb.
AzerVoice xəbər verir ki, UNRWA agentliyi ərazidə baş verən hadisənin səbəbi barədə təfərrüat verməyib.
Qeyd edək ki, İsrail hakimiyyəti təşkilatın 2025-ci ildə ölkədəki fəaliyyətini qadağan etdikdən sonra, keçən həftə bu ərazini müsadirə edərək söküntü işlərinə başlamışdı.
"İsrail hakimiyyəti tərəfindən basqın edilib dağıdıldıqdan sonra, işğal altındakı Şərqi Qüdsdə yerləşən UNRWA qərargahı indi də yandırılıb". - deyə bəyanatda qeyd edilib.
Təşkilat bu yanğını "Fələstin qaçqınlarının statusunu ləğv etmək üçün davam edən cəhdin" bir hissəsi kimi qiymətləndirib.
Yanğın və xilasetmə xidməti bazar günü səhər saatlarında obyektə daxil olan çağırışa cavab verdiklərini, "yanğını söndürmək və yayılmasının qarşısını almaq" üçün çalışdıqlarını bildirsə də, onlar da səbəb göstərməyiblər.
BMT keçən həftə baş verən müsadirə və söküntüləri sərt şəkildə pisləyib. UNRWA isə öz mülkiyyətinin BMT-nin imtiyaz və immunitetləri ilə qorunduğunu israrla vurğulayıb və bazar günü bu mövqeyini bir daha təkrarlayıb.
UNRWA-nın sözçüsü Conatan Fauler bazar günü AFP-yə bildirib: "Dünyanın istənilən yerindəki hər bir BMT üzvü olan dövlət kimi, İsrailin də istisnasız olaraq BMT obyektlərini qorumaq və onlara hörmət etmək üzrə hüquqi öhdəliyi var".
UNRWA xüsusi olaraq 1948-ci ildə İsrailin yaradılması zamanı didərgin düşmüş yüz minlərlə fələstinli üçün təsis edilib və qaçqın statusunun qeydiyyatı, səhiyyə və təhsil xidmətləri göstərir.
İsrail tərəfindən ilhaq edilmiş Şərqi Qüdsdəki bu kompleks, fəaliyyəti qadağan edən qanunun qüvvəyə mindiyi 2025-ci ilin yanvarından bəri işçilərdən boşaldılıb.
İsrail UNRWA-nı HƏMAS-a örtük təşkil etməkdə ittiham edir. Aparılan bir sıra araşdırmalar agentlikdə "neytrallıqla bağlı məsələlər" aşkar etsə də, İsrailin qəti sübut təqdim etmədiyi qənaətinə gəlib.
UNRWA hələ də işğal altındakı İordan çayının qərb sahilində və Qəzzada fəaliyyət göstərir.