BAKI, AzerVoice, Orxan Qədirzadə

İsrail ordusu Qəzza zolağında saxlanılan son israilli əsirin cəsədinin aşkar edildiyini açıqlayıb.

AzerVoice xəbər verir ki, İsrail Müdafiə Qüvvələrinin sözçüsü Aviçay Adraei Milli Məhkəmə-Tibbi Ekspertiza Mərkəzi, İsrail Polisi və Hərbi Ravvinatın birgə apardığı identifikasiya prosesindən sonra Ran Qvilinin cəsədinin ailəsinə təhvil verildiyini bildirib. Onun sözlərinə görə, bununla da Qəzza zolağında saxlanılan bütün israilli girovlar İsrail tərəfinə qaytarılıb.

Bəyanat HƏMAS-ın hərbi qanadının atəşkəs vasitəçilərinə son əsirin cəsədinin mümkün yeri barədə bütün məlumatları ötürdüyünü açıqlamasından sonra verilib. Məlumata görə, bu addım ABŞ-nin vasitəçiliyi ilə əldə edilmiş atəşkəs razılaşması çərçivəsində atılan mühüm mərhələ kimi qiymətləndirilir.

Həmçinin bu hadisə oktyabr ayında əldə edilmiş atəşkəs razılaşmasının növbəti mərhələsinə keçidin qarşısını alan əsas maneəni aradan qaldırır.

İsrail tərəfi daha əvvəl bəyan etmişdi ki, Qəzza ilə Misiri birləşdirən Rəfah sərhəd-keçid məntəqəsi yalnız son əsirin tapılmasından sonra açılacaq. Eyni zamanda vurğulanıb ki, Rəfah keçidi yalnız şəxslərin məhdud keçidi üçün fəaliyyət göstərəcək.