BAKI, AzerVoice, Nailə Babazadə
Azərbaycan səfərindən qayıdarkən təyyarədə jurnalistlərin suallarını cavablandıran Türkiyə Prezidenti Rəcəb Tayyib Ərdoğan Qəzzadaki vəziyyət, HƏMAS və ABŞ Prezidenti Donald Trampla aparılan danışıqlar barədə ətraflı məlumat verib.
AzerVoice xəbər verir ki, Ərdoğan bildirib ki, Türkiyə illərdir Qəzzədə qan tökülməsinin dayandırılması və fələstinlilərin təhlükəsizliyinin təmin olunması üçün çalışır.
“Fələstinlilər yaxşı bilirlər ki, Türkiyə onların maraqlarını qoruyur və müdafiə edir. Qəzzədə baş verən faciənin dayandırılması üçün daim səylər göstəririk. HƏMAS-la mütəmadi əlaqədəyik və Fələstinin gələcəyi üçün ən düzgün addımların hansı olmalı olduğunu izah edirik.”-deyə Ərdoğan bildirib.
Prezident əlavə edib ki, ABŞ lideri Donald Trampla həm BMT görüşündə, həm də telefon danışıqlarında Qəzzədə sülhün necə təmin edilə biləcəyini müzakirə edib.
“Tramp bizdən HƏMAS-la danışıb onları razı salmağımızı istədi. Biz dərhal bu istiqamətdə hərəkət etdik. HƏMAS sülh və danışıqlar üçün hazır olduğunu bildirdi. Bu, çox dəyərli addımdır. Amma İsrail tərəfindən bu günə qədər eyni müsbət münasibəti görmürük. İki dövlətli həll prinsipinə əsaslanaraq problemi aradan qaldırmağa çalışacağıq.”-deyə o qeyd edib.
Prezident Qəzzədə planlaşdırılan “Sülh Şurası” və “Beynəlxalq Sabitlik Qüvvəsi”ndə Türkiyənin iştirakı ilə bağlı suala belə cavab verərək, “Bizim üçün əsas məqsəd tezliklə hərtərəfli atəşkəsin təmin edilməsidir. Qəzzəyə humanitar yardımların maneəsiz çatdırılması və dağıdılmış infrastrukturun bərpası prioritetdir. Təhlükəsizliyin hansı üsulla təmin ediləcəyi və sabitlik qüvvəsinin necə qurulacağı məsələsi Şarm əl-Şeyxdə müzakirə olunur. Biz bütün sülh təşəbbüslərinə dəstək verməyə hazırıq.”-deyib.
Ərdoğan bildirib ki, Milli Kəşfiyyat Təşkilatının (MİT)rəhbəri də bu müzakirələrdə iştirak edir və oradan çıxacaq nəticələrin mühüm əhəmiyyət daşıyacağını vurğulayıb.
“Ümid edirik ki, İsrail öhdəliklərinə sadiq qalacaq və barışı pozacaq addımlar atmayacaq.”-deyə Ərdoğan qeyd edib.
Türkiyə Prezident “Əzm Donanması” hadisəsinə də toxunaraq bildirib ki,“Flotiliya Qəzzaya humanitar yardım aparırdı, lakin İsrail beynəlxalq hüququ pozaraq beynəlxalq sularda hücum etdi. Biz dərhal həm öz vətəndaşlarımızın, həm də digər ölkə nümayəndələrinin azad edilməsi üçün tədbir gördük. Türk Hava Yolları və dövlət qurumlarımız onlara tam dəstək göstərdi. Hər kəsin böyük fədakarlığı nəticəsində vətəndaşlarımız təhlükəsiz şəkildə ölkəyə qayıtdı.”
Ərdoğan əlavə edib ki, hadisə zamanı Türkiyə pilotsuz uçuş aparatları və gəmiləri vasitəsilə vəziyyəti real vaxt rejimində izləyib.
Ərdoğan eyni zamanda Qəzzada baş verənləri “bəşəriyyətin vicdan sınağı” adlandırıb.
“67 min insan həyatını itirib, 169 mindən çoxu yaralanıb. Amma dağıntılar altında qalanlarla bu rəqəmin 600 minə yaxın olduğu bildirilir. İsrailin etdikləri planlı soyqırımdır. Xəstəxanaları, məktəbləri, bazarları, ibadət yerlərini vurmaqla insanlıq tarixində qara iz buraxıb. Bu hadisələr qarşısında səssiz qalanlar da eyni dərəcədə məsuliyyət daşıyır.”-deyə Türkuyı Prezidenti əlavə edib.