BAKI, AzerVoice, Orxan Qədirzadə
2026-cı il üzrə qlobal miqyasda ən güclü pasportların siyahısı açıqlanıb və ilk pillədə Asiya ölkələri üstünlüyünü qoruyub.
AzerVoice xəbər verir ki, ABŞ-ın “CNN” telekanalı Beynəlxalq Hava Nəqliyyatı Assosiasiyasının məlumatlarına əsaslanan “Henley Passport Index”in ən son hesabatına istinadla 2026-cı il üçün dünyanın ən güclü pasportlarını təqdim edib. Hesabata görə, səyahət azadlığı və viza tələblərinin minimum səviyyədə olması baxımından lider mövqeləri əsasən Asiya və Avropa ölkələri tutur.
Reytinqdə birinci yerdə Sinqapur qərarlaşıb. Bu ölkənin vətəndaşları dünyanın 227 ölkə və ərazisindən 192-nə vizasız səfər edə bilir. İkinci pilləni Yaponiya və Cənubi Koreya bölüşür. Hər iki ölkənin pasport sahibləri 188 istiqamətə vizasız giriş imkanına malikdir.
Üçüncü yerdə isə beş Avropa ölkəsi – Danimarka, Lüksemburq, İspaniya, İsveç və İsveçrə qərarlaşıb. Bu ölkələrin pasportları 186 ölkə və əraziyə vizasız səfər imkanı yaradır. Dördüncü pillə də tamamilə Avropa ölkələrinə məxsusdur: Avstriya, Belçika, Finlandiya, Fransa, Almaniya, Yunanıstan, İrlandiya, İtaliya, Niderland və Norveç 185 istiqamətə vizasız giriş imkanına malikdir.
Beşinci yerdə Macarıstan, Portuqaliya, Slovakiya, Sloveniya və Birləşmiş Ərəb Əmirlikləri (184 bal) qərarlaşıb. Altıncı pillədə Xorvatiya, Çexiya, Estoniya, Malta, Yeni Zelandiya və Polşa yer alıb. Yeddinci yerdə Avstraliya, Latviya, Lixtenşteyn və Böyük Britaniya qərarlaşıb.
Hesabatda Böyük Britaniyanın illik geriləmə baxımından ən çox itirən ölkələrdən biri olduğu qeyd edilir. Britaniya vətəndaşlarının vizasız səfər edə bildiyi ölkələrin sayı son bir ildə 8 vahid azalıb. ABŞ isə 179 istiqamət ilə onuncu yerə qayıdıb, lakin son 12 ayda 7 istiqamət üzrə vizasız səyahət imkanını itirib və son 20 ildə reytinqdə ən ciddi geriləmələrdən birini yaşayır.
Siyahının sonunda Əfqanıstan (24 istiqamət), Suriya (26 istiqamət) və İraq (29 istiqamət) yer alır. Bu isə ən güclü və ən zəif pasportlar arasında 168 istiqamətlik ciddi fərq yaradır.
“Henley & Partners” şirkətinin rəhbəri Kristian Kalin bildirib ki, pasportun gücü birbaşa siyasi sabitlik, diplomatik etibarlılıq və beynəlxalq qaydaların formalaşdırılmasında iştirak imkanları ilə bağlıdır. Analitiklərə görə, ABŞ və Böyük Britaniya kimi ölkələrdə səyahət azadlığının azalması daha dərin geosiyasi dəyişikliklərin göstəricisidir.