BAKI, AzerVoice, Nailə Babazadə

Misir Prezidenti Əbdülfəttah əs-Sisi ABŞ Prezidenti Donald Trampın Misir və Efiopiya arasında Nil çayı suları ilə bağlı yaranmış mübahisəni həll etmək üçün təqdim etdiyi vasitəçilik təklifini yüksək qiymətləndirdiyini bildirib.

AzerVoice xəbər verir ki, şənbə günü sosial media hesabı vasitəsilə açıqlama verən Sisi, Trampın məktubuna cavab olaraq Misirin mövqeyini və Efiopiyanın "Böyük Efiopiya İntibah Bəndi" (GERD) layihəsi ilə bağlı su təhlükəsizliyi qayğılarını bir daha təsdiqlədiyini qeyd edib. Donald Tramp həm Sisiə ünvanladığı, həm də özünün "Truth Social" hesabında paylaşdığı məktubunda bu ifadələrə yer verib: "Nil sularının paylaşılması məsələsini birdəfəlik və məsuliyyətli şəkildə həll etmək üçün Misir və Efiopiya arasında ABŞ-ın vasitəçiliyini yenidən başlatmağa hazıram."

Efiopiyanın 9 sentyabrda Nil çayının qolu üzərində inşa etdiyi 5 milyard dollar dəyərindəki GERD bəndinin açılışını etməsi, çayın aşağı axınında yerləşən Qahirənin sərt narazılığına səbəb olub. Əddis-Əbbəbə bu bəndi ölkənin iqtisadi inkişafı üçün mərkəzi amil hesab etsə də, Misir layihənin beynəlxalq müqavilələri pozduğunu, həm quraqlığa, həm də daşqınlara səbəb ola biləcəyini iddia edir.

Çayın aşağı axınındakı digər ölkə olan Sudan da öz su təchizatı və bəndlərinin təhlükəsizliyi ilə bağlı narahatlığını ifadə edib. Sudanın ordu rəhbəri Əbdülfəttah əl-Burhan da şənbə günü verdiyi açıqlamada Trampın vasitəçilik təklifini alqışladığını bildirib.